Одил Аҳмедов: “Мустақиллигимизнинг 25 йиллиги билан барча юртдошларимизни табриклайман”

Ушбу баҳсдан сўнг Ўзбекистон терма жамоаси сардори Одил Аҳмедов ўз фикрларини билдирди.

“ЖЧ 3-саралаш гуруҳ босқичида илк ўйиндаги ғалаба сув ва ҳаводек зарур эди. Сурия термасига қарши жуда ҳам қийин ўйин бўлди. Майдоннинг ҳолати ҳам талабга жавоб бермайди. Биз ўзимиз истаган ўйинни кўрсата олмадик. Лекин энг асосийси натижа, 3 очкони қўлга киритдик. Футболда ҳар хил вазият бўлади, Сурия ҳимоявий ўйин кўрсатди. Рақибимиз ҳимояга ётиб олгани учун дарвозагача боришга қийналдик. Ҳозирги замонавий футболда тезкор қарши ҳужумда гол урилади. Сурия бизга бундай имкониятни тақдим этмади, шунинг учун ҳам биринчи бўлимда гол ура олмадик. Биз бор эътиборимизни Сурияга қарши ўйинга қаратган эдик. Сурия тўсиғидан ҳам ўтиб олдик, энди Қатар терма жамоасини ўрганишни бошлаймиз. Насиб қилса Қатардан 3 очко билан қайтамиз. Мустақиллигимизнинг 25 йиллиги учун ҳам биз ғалаба қозонишимиз шарт эди. Мана шу улуғ байрам билан юртдошлиримизни табриклайман”, - дейди Ўзбекистон терма жамоаси сардори Одил Аҳмедов.

Жаҳонгир Сотволдиев