Нўъмонжон Юсупов: "Эртага ҳужумкор ўйин кўрамиз"

"Эртанги ўйинга ўз режамиз бор. Рақиб яхши ва таниш жамоа. Уларнинг икки ўйинини кўриб чиқдик. Ижобий натижани қўлга киритишга уриниб кўрамиз. Биринчи ўйинда режаларимиз амалга ошмади. Иккинчи ўйинда эса йигитлар ҳаракатларига темп қўшишди. Мухлисларимиз биздан ғалаба кутишмоқда".

- Айтганингиздек, дастлабки турда жамоа йирик ҳисобда мағлуб бўлди. Иккинчи учрашувда эса футболчилар характер кўрсата олди: 4та гол урди, лекин 5та гол ўтказиб юборди. Эртанги баҳсдан нима кутиш мумкин?

- "Олой" таркибидаги кўп футболчилар янги. Ёш футболчилар ҳам бор. 2-3 нафар тажрибали футболчиларимиз бизга ёрдам бериши кутилганди. Бироқ, бу баҳона бўлмаслиги керак. Эртага таркибда ротацияларни амалга оширамиз. Ким ютишини ўйин кўрсатади. Бир-бирига муносиб жамоалар тўқнаш келади. Ўйлайманки, ортимизга яхши кайфият қайтамиз.

- Ўз вақтида "Хўжанд"да фаолият олиб боргансиз. Эртага жамоангиздан мухлисларбоп ва чиройли футбол кутсак бўладими? Чунки дуранг ҳам икки жамоани қониқтириши мумкин...

- Икки жамоа ҳам мусобақани кўтаринки руҳда якунлаш учун ғалаба қозонишга ҳаракат қилади. Эртага ҳужумкор футбол кўрсатамиз. 

- Фаолиятингизни "Олой"да давом эттирасизми ёки бошқа клублардан таклифлар борми?

- Клуб билан йил якунига қадар шартномам бор. Таклифлар ҳар доим бўлган. Мусобақадан сўнг раҳбарият қандай қарор қабул қилишига ҳам кўп нарса боғлиқ. Қайси клубда ишлаган бўлсам шароитлар яхши бўлган. Муаммо йўқ. Ишлашда давом этяпмиз. "Хўжанд"га қарши ўйиндан олдин ҳиссиётлар бўлиши таббий. Тўрт йилга яқин вақт давомида бу клубда ишлаганман. Мухлисларга, раҳбариятга омад тилайман.

- Ўтган ўйинда ўзини ёмон тутган футболчига нисбатан чора кўрилдими? 

- Кийиниш хонасида конфликт бўлмади. Жиддий чора кўрилди. Жазо қўлланилди. Муносабатлар ёмон кўриниш олмаган. Халқаро ўйинларни барча томоша қилади. Бу жамоамизнинг юзи.