“Навбаҳор” – “Алай” учрашуви бўйича мураббийлар қандай фикрда?

Александр Бельдинов (“Алай” бош мураббийи): - Авваламбор, ушбу ўртоқлик учрашувини ўтказиш бўйича берилган таклиф учун “Навбаҳор” клуби ва унинг раҳбариятига миннатдорлик билдираман. Кучли рақибга қарши ўйнаш имкониятига эга бўлдик. Айни пайт чемпионатга тараддуд кўряпмиз, бугунги учрашувни ҳам мазкур тайёргарлик доирасида ўтказдик. Албатта, бу каби халқаро ўйинлар биз учун катта тажриба мактаби вазифасини ўтайди. Гарчи бугун мағлубиятга учраган бўлсакда, “Навбаҳор”га қарши ўйинда майдонга тушиш биз учун олдинга ташланган қадам ҳисобланади. Аммо тан олиш керак, бугун мезбонлар ҳақли равишда ғалабага эришишди. Улар бизга нисбатан тезроқ, уюшқоқликда ҳаракат қилишди, таркибларидан ҳам савияси юқори футболчилар ўрин олишган. Шу боис ҳам, натижа ҳаққоний бўлди. Лекин бу мағлубиятдан тегишли хулоса чиқарамиз.

Наманганга ташрифимиздан аввал “Навбаҳор”да малакали мураббийлар фаолият юритиши, маҳоратли футболчилар борлигидан хабардор эдик. Гарчи жамоа айни пайт Ўзбекистон Суперлигаси турнир жадвалида 10-ўринда бораётган бўлсада, мусобақа иштирокчилари тўплаган очколар орасидаги фарқ катта эмас ва бир-иккита ғалаба жамоани юқори ўринларга кўтариши мумкин. Бир сўз билан айтганда, кучли рақибдан таклиф тушиши ҳамоно, уни бажонидил қабул қилдик. “Навбаҳор”га келгуси учрашувларда омад тилайман.

 Виктор Жалилов (“Навбаҳор” бош мураббийи): - Яхши, жанговар беллашув гувоҳига айландик. “Алай”нинг ўйини ҳам менга маъқул бўлди, футболчилари майдонда муносиб тўп тепишди. Уларга келгуси учрашувларда омад ёр бўлсин. Жамоамизга келсак, сўнгги тўрт кун ичида катта юкламалар бергандик, шогирдларимнинг ҳаракатларида камчиликлар кузатилгани шу билан боғлиқдир, эҳтимол. Буларнинг барини тўғриласа бўлади, асосийси, футболчиларимизнинг юкламалардан кейин майдонда қандай ўйин кўрсатишларини аниқлаб олдик. Умуман олганда эса, бугун йигитлар яхши ўйнашди, ўз навбатида, бир нечта қулай имкониятлардан фойдалана билишмади. Ўйинчиларнинг ҳолатини яна бир бор синовдан ўтказдик, легионерлар ҳам, айни пайт жамоа ихтиёрида бўлиб турган, бизга яхши таниш бошқа футболчилар ҳам ўзларини кўрсатишди.

“Навбаҳор” ПФК матбуот хизмати.