Мирко Йеличич: "Яхши ҳужумчи керак"

Шу муносабат билан, австралиялик мутахассис билан микст зонада суҳбатлашдик.

- Мирко, сизни ва жамоангизни узоқ кутилган муваффақият билан табриклайман. Босиб ўтилган қадам енгил кечмади...
- Ҳафтада икки маротаба ўйнаш биз учун бироз қийинчилик туғдирди. Ҳозирданоқ чарчоқ аломатлари йўқ эмас. Лекин жамоа сифатида бу машаққатларни енга олдик. Бугун ҳам жуда қийин ўйинлардан бирини ўтказиб, якунда енгил тин олдик. Бу билан барча ўзбекистонлик мухлисларни табрикласам бўлади.

- Кейинги босқич ўйинларига ҳали уч ой вақт бор. Ўйлаб олиш учун катта муҳлат. Қаерда хато бўлди, нималарни тўғирлаш деганидик...
- Тўғри. 1/4 финалга чиққанимиз билан, барча ўйинларда зўр ўйнадик деб айта олмайман. Айниқса "Сепахон" билан икки ўйинда ғалаба қозонган бўлсакда, бу гуруҳдаги вазиятимизга катта таъсир ўтказди. Эронликлар билан ўйин биз учун энг қийини бўлди десам ҳам бўлади. Ундан ташқари, сиз айтган камчиликлар ҳам йўқ эмас. Бу борада ўйлаб режа тузамиз.

- Саудия Арабистонининг иккита жамоасига қарши, икки хил вақтда тўп тепдингизлар. Бири жазирамада, бири энди иссиқ мавсуми бошланаётганида. "Ал Ҳилол" билан бўлиб ўтган биринчи ўйин аввалгисидан анча қийин бўлгани кўрдик?
- Саудия Арабистони жамоаларига қарши сафарда ҳаракат қилиш доим қийин бўлган. Сўнгги ўйинимиз 40 градус иссиқда, юқори намлик остида кечди. Нафас олишни ўзи оғир, биз футбол ўйнашимиз керак эди. Бугун об-ҳаво икки томонга ҳам ҳалақит қилмади ва бу ерда ўйин биринчи планга чиқди.

- ОЧЛ-2016ни қўлга киритишда иккита яққон фаворит бор эди. Булардан бири билан бугун хайрлашдик, "Ал Ҳилол". Иккинчиси "Гуанчжоу Эвергранд" сенсацион тарзда гуруҳда қолиб кетди. Яхшилаб уринса, "Локо" учун катта имконият туғилгандек. Қайси нуқтани кучайтирган бўлардингиз?
- Ҳужум чизиғини кучайтириб олсак чакки бўлмасди. Аслини олганда таркибимизда яхши ҳужумчидар бор. Шунчаки, Мирзаев, Бикмаев ва Абдухолиқов сўнгги йилларда мавсумни бундай бир маромда ўтказишмаганди. Улар ҳозир ҳар бир ўйинда имкон қадар тўлиқ ҳаракат қилишяпти. Агар бунга кўниккан футболчи бўлганида бошқача бўларди. Биздаги муаммо мана шунда.

- Бенжамин белгилаган пенальти ва ундан кейинги 5 дақиқа сиз учун қандай ўтди?
- Қийин вазиятга тушиб қолдик. Бу ерда пенальти менимча йўқ эди. Ҳакамни қарорини ўзгартира олмаймиз. Вазиятни ушлашга ҳаракат қилдик, муҳими футболчиларимиз саросимага тушиб қолишмади.


Нодирхўжа Юлдашев.