Маркес Лопес: “Навбаҳор” бизга қараганда жисмонан тайёрроқ бўлиши мумкин, аммо бу бир ўйинда ёрдам бермайди"

"Осиё чемпионлар лигасидаги қарама-қаршиликлар ўзига хос аҳамиятга эга ва чемпионат ўйинларидан фарқ қилади. Мақсадимиз — ижобий натижага эришиш ҳамда гуруҳ босқичида иштирок этиш.

Биласизми, "Ал Вакра" охирги марта ОЧЛда 2002 йил иштирок этган ва ўшадан бери жамоа бундай катта турнирда қатнашмаган. Шу боис, биз энг яхши ўйинимизни кўрсатгани майдонга тушамиз ва ўзимиз истаган натижани қайд этишга ҳаракат қиламиз.

Шогирдларимдан бўлажак ўйинга катта эътибор билан муносабатда бўлиши талаб этилади. Бу ўйин Қатар футболи, хусусан, "Ал Вакра" шаҳри аҳолиси учун муҳим аҳамиятга эга.

“Навбаҳор” жамоаси ҳақида баъзи маълумотларга эгаман. Улар яхши жамоа, Ўзбекистон чемпионати турнир жадвалида биринчи ўринда бормоқда. Аммо йўқотадиган нарсамиз йўқ, шу боис мақсадимизга эришиш учун бундай имкониятдан фойдаланишимиз керак.

Ўзбекистон чемпионати бир ҳафта олдин бошланган Қатар чемпионатидан фарқли ўлароқ 17-турга етиб келди. Албатта, “Навбаҳор” жамоаси бизга қараганда жисмоний жиҳатдан тайёрроқ бўлиши мумкин, аммо бу кўп нарсани англатмайди, чунки бу тайёргарлик бир ўйинда унчалик ёрдам бермайди", - деди Лопес.