- Ўйин ҳақида фикрингиз?
- Бир томондан ютқазиб қўймаганимиз учун хурсандмиз, бир томондан уйда икки очко бой берилганидан хафамиз. Қолаверса бугун етакчи жамоага қарши баҳс олиб бордик, "Арал"да бунгача учта ғалаба бор эди. Футбол ўйнаяпмиз, ҳаракат қиляпмиз, лекин нимадир етишмаяпти.
- Ёрқин ака, авваламбор Сизга ҳамдардлик билдирамиз. Саволга келадиган бўлсак, "Каттақўрғон" олдига юқори мақсадлар қўйилганини биламиз. Бу борада ишлар қандай кетяпти?
- Ҳамдардлик учун раҳмат. Оллоҳнинг иродаси, бандаси ожиз, қўлимиздан ҳеч нарса келмади. Каттақўрғонда иккита стадионимиз бор, биттасини ПФЛ қабул қилмади. Иккинчисида қишдан бери катта қурилиш кетяпти. Шу боис биринчи уй учрашувини Тошкентда ўтказдик. Бугун эса Самарқандда ўз ўйинимизни ўтказдик. Жамоамиз олдига Суперлигага чиқиш вазифаси қўйилган, бу борада ҳаракат кетяпти. Энди тўртинчи турга келдик. ҳали олдинда ўйинлар кўп. Насиб қилса ўз мақсадимизга эришамиз.
- Иккинчи даврада жамоа ўз ўйинини Каттақўрғонда ўтказиши мумкинми?
- Самарқанднинг ҳар бир ҳудудида футбол мухлислари кўп. Ўз пайтида ўзим ҳам "Динамо"да ўйнаганимда буни ҳис қилганман. Ишқибозлар ҳар доим кўп келган. Бу борада каттақўрғонлик мухлислар ҳам бўш келмаяпти, бугун ҳам кўпчилик бўлиб бизни қўллаб туришди. Тўғри айтдингиз, натижага эришиш учун мухлисларнинг роли катта. Чунки футболни мухлислар учун ўйнаймиз. Айтиб ўтганимдек, Каттақўрғондаги стадионда катта қурилиш кетяпти, тайёр бўлиши билан шу стадионда уй ўйинларини ўтказамиз. Қанча тез тайёр бўлса, биз учун ҳам шунча яхши.
- Тўғри айтдингиз, футболда ғалаба қозониш учун мухлислар битта фактор бўлса, иккинчи фактор майдон ҳолати ҳисобланади. Биламизки, ўйин услубингиз қисқа пасларга асосланган. Бу борада Пролигадаги майдонлар ҳолати сизга қанчалик ёрдам беряпти?
- Ўзингиз кўрдингиз, бу стадионда анчадан бери ҳеч ким ўйнамаган. Биринчи таймда тўпни ушлаш қийин бўлди. Иккинчи таймда майдонга мослашиб олдик ва ердан ўйнай бошлаганимиздан сўнг вазиятлар ҳам бўлди, ўйин янада қизиқ кечди. Умуман олганда Пролигада ҳамма яхши стадионларда ўйнаяпти. Масалан, "Ғазалкент" уй учрашувларини "Бунёдкор"да ўтказяпти. "Олимпик Мобиуз" "Жар"да, РФА "Дўстлик"да, водий жамоалари ҳам яхши майдонда, "Лочин" клуби ҳам яхши стадионда уй ўйинларини ўтказмоқда. Бу эса ҳаммамизни хурсанд қиляпти. Бир ҳафта-ўн кун ичида майдонимиз янаям яхши ҳолатда бўлишига умид қиламиз.
- Георгий Пантцулая нима учун захирада қоляпти? Унда жароҳат борми?
- Жароҳати йўқ, аксинча аввалги учта ўйин асосий таркибда майдонга тушди. Бугун ўйин услубимиз ёшларни олдинга қўйиб, шу орқали рақибга прессинг қилиш эди. Георгий гол урадиган футболчи, шу боис иккинчи таймга асрадик. Ҳали кўп голлар уриб жамоамизга фойда келтиради.
- Рақибда таркиб борасида муаммолар борлигини ҳисобга олганмидингиз?
- Мен "Арал" таркибини кўрдим, аввалги учта ўйинда майдонга тушганлар бугун ҳам ўйнашди. Ҳеч қанақа ўзгариш кўрмадим. Бизга қарши "Шўртан" ҳам ҳимоявий тактикани танладик. Бугун "Арал" ҳам шундай қилди. Демак, уларда ўйин услуби шундай бўлса керак. Рақибнинг жароҳат олган ўйинчилари борасида бизда маълумот йўқ эди. Ҳозир ҳаммага қийин, ҳар тўртинчи-бешинчи кунда майдонга тушяпмиз. Балки биз ҳам кейинги баҳсда ротация қилармиз.
- Захирадан жой олган Исак Мартинс Сильва ҳақида сўрамоқчиман. Ундан кўп нарса кутгандик, лекин нимагадир асосий таркиб ўйинчиси бўла олмаяпти. Бу нима билан боғлиқ?
- Унинг муаммоси битта: жуда дангаса. Лекин Исак ҳали ёш, энди 19га кирди. Агар дангаса бўлмаганида ҳозир умуман бошқа жойда тўп тепаётган бўларди. У билан ўйнаган шериги 20 миллионга сотилганини эшитдим. Бу боланинг ўзи дангаса. У керак бўлса Суперлигамизда энг яхши легионерлардан бири бўла олади, фақат дангасаликни йиғиштириб ўз устида ишлаши керак. Машғулотларда ҳаракати бор, техникаси ҳам зўр. Лекин вақт керак.
