– Ўйиндан кейинги фикрларингиз билан ўртоқлашсангиз.
– Ўйинга келадиган бўлсак, ўзингиз гувоҳ бўлдингиз, мураккаб баҳс бўлди. Уч очкони қўлга киритиш осон кечмаяпти. Яқиндагина ўқув-машғулот йиғинида бу жамоани қийинчиликсиз мағлуб этаётган эдик. Футболчилар ўша-ўша, аммо кўриб турганингиздек, расмий ўйинда қанчалик мураккаб бўлди. Фурсатдан фойдаланиб, барча мухлисларимизни ва "Каттақўрғон" жамоасини ғалаба билан табриклайман.
– Жамоада ҳозир бир муаммо кўзга ташланмоқда: олдинги ўйинларда, айниқса, биринчи бўлимда жамоа кўнгилдагидек ҳаракат қила олмаяпти. Бугун ҳам рақиб босим ўтказган пайтда футболчилар чуқур ҳимояга ўтиб олишди. Бу нима билан боғлиқ? Сабаби жисмоний ҳолатгами?
– Жуда ўринли савол бердингиз. Бу ҳолат ўзимизни ҳам ўйлантирмоқда, ҳар куни ўйинларни таҳлил қиляпмиз. Мана, бешинчи тур ўтди. Биринчи бўлимда таркибни турлича шакллантириб кўряпмиз, бироқ негадир ўйинимиз қовушмаяпти. Иккинчи бўлимда эса майдонга тушиб, гол уряпмиз ва ғалаба қозоняпмиз. Бунинг сабаби рақиб босимидан чарчаб қолиш ёки жисмоний пасайиш эмас. Нима учундир айнан биринчи бўлимда ўйинимиз чиқмаяпти. Бунинг сабабларини ўрганяпмиз: таркибда ўзгаришлар қилиб кўрдик, турли усулларни қўлладик. Иккинчи бўлимда эса йигитлар қайта тизилиб, ўзимиз истаган ўйинни намойиш этишмоқда. Вазиятлар яратяпмиз ва голлар уряпмиз.
– Ўтган учрашувга нисбатан жорий ўйинда бошланғич таркибда сезиларли ўзгаришлар кўзга ташланди. Бу янги футболчиларни синаб кўриш мақсадида амалга оширилдими ёки тактик ўзгаришларми?
– Бу юқоридаги саволингизга узвий боғлиқ. Биринчи бўлимдаги хатоликлардан сўнг, эҳтимол, бошланғич таркибни нотўғри танлаяпмизми, деган фикр билан бошқа футболчиларни майдонга тушириб кўряпмиз. Бу фақат сўнгги ўйинда эмас, балки аввалги учрашувлардан бери кузатилаётган ҳолат. Шукрки, бизда захира ўриндиғи кенг. Шунинг учун кимнингдир ўйини қовушмаса ёки тактикани ўзгартирмоқчи бўлсак, захирадаги бошқа ўйинчиларни майдонга тушириб синаб кўряпмиз.
