Жаҳон футбол лигалари форуми Осиё етакчилари учун учрашув ташкил қилди

Форум ташкилотчилари Осиё қитъаси вакилларининг алоҳида йиғилишини ҳам ўтказди. Унда Япония, Саудия Арабистони, Жанубий Корея, Ўзбекистон, Қатар, БАА, Малайзия ҳамда Ҳиндистон лигалари иштирок этди.

2022-йилдан бошлаб Осиё футбол конфедерацияси ҳам қитъанинг етакчи лигалари билан ўзаро фикр алмашишни йўлга қўйганини қайд этиш керак. Осиё қитъасининг қолган конфедерациялардан сезиларли катта эканлиги география, иқлим, масофа, футболнинг ривожланиши тезлиги каби масаларга ўз таъсирини ўтказиб келади. Шу кунга қадар мусобақаларга, асосан, терма жамоалар нуқтаи назари билан эътибор қаратилган бўлса, эндиликда юқорида қайд этилган давлатлар лигалари ўзаро ҳамкорликда ҳаракат қилишни бошлади. Бу эса клублар иштирокидаги мусобақаларни янги босқичга олиб чиқишда муҳим аҳамият касб этади.  

Ўзбекистон Профессионал футбол лигаси клубларни лицензиялаш масаласида 2021-йилги мавсум якунлари бўйича Осиёда Япония ва Жанубий Кореядан кейин учинчи бўлганини қайд этиш керак. Шунга қарамай, медиа ва маркетинг масалаларида қитъа етакчилари бошқа мамлакат лигалари ҳисобланади. ЎзПФЛ мавжуд муаммоларни ўрганиш ва бунда етакчиларга максимал яқин бўлиш ҳаракатларини аллақачон бошлаган.