- Жуда қизиқарли ўйин бўлди. Бугун биттагина гол бўлган бўлса ҳам иккала жамоада кўпроқ голлар уриш учун етарлича имкониятлар юзага келганди. Ўйин давомида жамоамда энергия етарлича бўлди. Иккинчи бўлимда барча кўрсатмаларга амал қилдик. Ўйин олдидан йигитларга фақатгина бир жамоа ютишни исташини ва шулар бизлар бўлишимиз кераклигини айтгандим. Рақибни жиддий прессинг қилиб, босим остига олишга, уларга ўйин услубини кўрсата олмаслигига ҳаракат қилдик. Биринчи бўлимнинг 25 дақиқасини яхши ўтказдик, ўйинни назорат қилдик. Биринчи бўлимнинг қолган қисмини эса рақиблар яхшироқ ўтказишди, кўплаб вазиятлар яратишди ва бизни кечиришди. Иккинчи бўлимда ҳам футболчилар кўрсатмаларни тўлиқ бажаришди. Кўрсатган ўйинимизни инобатга олсак биз голга лойиқ эдик. Биз "Сурхон"дан ҳам "Насаф"дан ҳам бир бош устун ўйнагандик. Шундай ўйинлардан кейин жамоанинг яхшиланишига ишонч пайдо бўлмоқда. Шу орқали биз очколар тўплаб, Суперлигада қоламиз.
- Пул муаммоси сабабли тактика ҳақида гапириш қийин. Жамоа футболчилари яхши ҳаракат қилишди, вазиятлар яратишди, бироқ гол уришда тажриба етишмаяпти. Айни дамда жамоадаги тажрибали футболчиларни келгусида нималар кутяпти деб ўйлайсиз?
- Мураббий сифатида айтаман, барибир тактикада гап кўп. Айни дамда муаммо руҳий ҳолатда. Шундай ўйинлар орқали жамоа пишиб боради. Ёш йигитлар Суперлига об-ҳавосига мослашади. Ўз навбатида футболчилар ҳам менинг талабларимга мос бўлишга ҳаракат қилишмоқда. Мен жанговар футбол намойиш қилиш тарафдориман. Тажрибали футболчилар эса жамоага катта ёрдам беришмоқда. Жамоадаги иштиёқ, хоҳиш бўйича муаммо кўрмадим. Бизнинг ҳолатимизни ҳисобга олиб, мен асосий эътиборни футболга қаратдим. Олдин жамоа чиройли футбол намойиш қилган, лекин ҳозир руҳий ҳолат ўзгарган ва буни енгиб ўтиш жуда қийин. Ўйин бобида бундай ҳолатларни фақатгина таслим бўлмаслик орқалигина енгиб ўтиш мумкин. Биз бу борада ишлаяпмиз. Бошни туширмаганча фақатгина навбатдаги ўйинга эътибор қилиш керак. "Бунёдкор" ҳали сафдан чиқмаган. Клуб бундай ҳолатларга тушиб қолган ва доимо чиқиб кетган ҳам. Буни барча билади. Ўйиндан ўйинга барчасини билиб борамиз ва сифатли футбол кўрсатишга ҳаракат қиламиз.
- Шунда тажрибали футболчилар жамоада қоладими?
- Сардор Раҳмонов, Абдумавлон Абдужалилов, Федерико Ботти ҳам жамоада қолади. Айрим футболчилар жароҳатланган. Терма жамоаларда сардор бўлган Азизбек Тўлқинбеков ҳам бор. Бобур Йўлдошев ва Матия Кривокапич каби футболчилар жароҳат олган. Улар "Бунёдкор"га ёрдам бериш учун жамоада қолишди. "Бунёдкор" ҳали парчаланиб кетмади, клуб учун ёрдам берадиганлар ҳали бор. Агарда ўша футболчилар тезроқ сафга қайтса, жамоа ҳам бўлади. Музаффар Олимжоновнинг ҳам сафга қайтиши қийинлашиб кетди. Ҳозир таркибда бўлган футболчиларнинг барчаси ҳолатни тўғри тушунмоқда, эътироз ҳам қилишмаяпти ва жамоага ёрдам беришга интилишмоқда.
- Сиз "Насаф"да ҳужумчи бўлгансиз. Қўл остингиздаги мураббийлар штаби нима иш қилади? Ҳужумчилар учун алоҳида мураббий олиб келса бўлмайдими? Чунки жамоа бир неча ўйиндан бери гол ура олмаяпти.
- Ҳозирги таркибдаги футболчиларнинг барчаси билан тўлақонли таниш эмасман, танишиб олиш учун вақтим ҳам кўп бўлгани йўқ. Тўғри айримлар билан олдин ҳам бирга ишлаганман. Ҳа, сўнгги 3 ўйинда гол урмаганимиз - бу факт. Бу камчилик борасида ишлаймиз, бизда минуслар жуда кўп. Менинг олдимга конкрет вазифа қўйилган - жамоани Суперлигада олиб қолиш. Клуб сифатида "Бунёдкор" бунга лойиқ. Таркибидан чиққан кўплаб футболчилар Европанинг топ даражали клубларида ўйнаётган клубнинг йўқ бўлиши жуда ёмон. Футбол ҳамжамияти ҳам тушуниб турибдики, "Бунёдкор" ўзбек футболи учун керак. Кейинги йили ҳам "Бунёдкор"нинг юқори даражада ўйнаши учун боримни берган бўлардим.
- Лутфулла Тўраевнинг вазифаси нимадан иборат?
- У менинг ёрдамчим. Акбар Исматуллаев ҳам шундай. Улуғбек Бакиев эса 6-7 йилдан буён шу клубда ишламоқда, у билан "Сўғдиёна"да ҳам бирга ишлаганмиз. Марат Галимов бизда дарвозабонлар мураббийи, у клуб академиясида ишлайди. Барчамиз бир-биримизни яхши биламиз ва биргаликда ишлаймиз.
