"Истиқлол" бош мураббий: "Остон Ўрунов бизга керак эмас деб айтмаганман. Мен Ўруновни ОЧЛдан бери кузатиб келгандим"

Бир неча кун аввал "Истиқлол" бош мураббийи Жавод Некунам ва клуб вице-президенти ўртасида Остон Ўруновнинг трансфери сабабли можарога боришгани ҳақида хабар берган эдик. Жавод Некунам "Санат Нафт"га қарши кечган учрашувдан кейинги матбуот анжуманида яна бир маротаба Остон Ўруновнинг трансфери бўйича изоҳ берди.

Жавод Некунам: "Ўрунов бизга керак эмас деганимни исботлаб беринг. Айрим бир шахсларда аудио исбот бор эди-ку. Ўша аудио хабарни оммага тарқатинглар. Кўрайлик-чи, ким Ўрунов бизга керак эмас деган экан. Мен Остон Ўрунов ва яна иккита эронлик футболчини жамоа қўшиб олиш кераклигини кўп маротаба айтгандим. Ўруновнинг ва иккита эронлик футболчи менга керак эди. Ўрунов трансфери бўйича ҳеч қандай ҳаракат қилмадик ва у "Персеполис"га йўл олди"

Шунингдек маҳаллий журналист Жалолиддин Машарипов "Истиқлол" сафига келиб қўшилганидан сўнг Остон Ўрунов вариантидан воз кечилгани ҳақида савол берганди. Жавод Некунам журналистнинг саволига қўйидагича жавоб берди.

"ОЧЛдаги "Навбаҳор" - "Нассажи" ўйинидан кейин мен Ўруновни сотиб олишимиз керак дедим. Бунга олти ой бўлди. Мавсум якунига кўра Остоннинг  "Навбаҳор" билан шартномаси тугаши ва биз ушбу ўйинчини ўз сафимизга қўшиб олишимиз кераклигини илтимос қилгандим. Остоннинг шартномаси учун 200 минг АҚШ долларидан кўпроқ сарфлашимиздан қатъий назар, мен ушбу футболчини ўз сафимизга қўшиб олишимиз кераклигини айтгандим. Расман хат жўнатдим ҳам. Машарипов эса эркин агент эди ва биз уни ўз сафимизга қўшиб олдик" - деди бош мураббий