Ўйиндан кейин "Нефтчи" бош мураббийи Ислом Исмоилов матбуот анжуманида иштирок этди.
- Ўйин ҳақида фикрингиз?
- Барчани чиройли ўйин ва ишончли ғалаба билан табриклайман. Бугун майдонда "Нефтчи"нинг бугуни ва эртасини кўрдик деб айта оламан.
- Нурмуҳаммад Абдуғаниев бошланғич таркибда тушиб, ўнг қанот ҳимоячиси сифатида ҳаракат қилди. Уни кашф қиляпсиз деб айтса бўлади. Умуман ушбу футболчи ҳақида фикрингиз?
- Нурмуҳаммад Абдуғаниев яхши ёш футболчилардан. Меҳнат қилишдан тўхтамаса, уни порлоқ келажак кутаётганини бир неча бор таъкидлаб ўтдик. Бугун марказий ҳимояда Анвар Ғофуров билан Боян Цигер ҳаракат қилгани боис, Нурмуҳаммадни ўнг қанот ҳимоясига қўйдик. Биринчи бор шу чизиқда тўп тепгани учун озгина хатолар кузатилди. Лекин умуман олганда 18 ёшли ҳимоячимиз иккита ўйиндан бери яхши таассурот қолдиряпти. Буни эса бутун жамоа ютуғи деб биламан.
- "Нефтчи"да кучли таркиб бор ва бу таркиб мураббийсиз ҳам юта олади дейишяпти. Шунга сизнинг муносабатингиз?
- Бу гап кўп марта билдирилмоқда. Тўғри, таркибимизда кучли футболчилар кўп ва бу футболчилар ўтган йил ҳам таркибда эди. Мураббий сифатида менинг вазифам жамоа ўйинига ўзгартириш киритиш эди. Ўйлайманки, буни амалга ошира оляпмиз. Жамоамиз ғалабаларида фақат футболчилар эмас, мураббийлар штаби билан клубимиз раҳбарияти қўшаётган ҳиссани ҳам жуда катта деб биламан. Бу ҳаммамизнинг меҳнати. Футболчиларда ўйин фалсафасини шакллантириш учун албатта мураббий меҳнати ҳам керак бўлади. Таркиб ўтган йилги, лекин бу йил умуман бошқа футбол намойиш этяпмиз деб бемалол айта оламан. Кинода Фармонбиби "Хўрозқанд чет элники бўлса ётволиб ялашади" деб бежизга айтмаган. Агар ўрнимда хорижлик мураббий бўлганида, ана чет эллик мураббий ҳамма ишни зўр қиляпти деган гаплар айтиларди. Майли нимаям дердик, бизнинг ишимиз меҳнат қилишдан тўхтаб қолмаслик. Барча танқидий фикрларга ўз меҳнатимиз ва натижаларимиз билан жавоб беришга ҳаракат қиламиз.
- Кейинги тур ОКМК билан ўйин ўтиб олгач, шундан сўнг жамоа режалари қандай кўринишда бўлади?
- Май ойида Ўзбекистон Кубогининг гуруҳ босқич учта учрашуви бўлиб ўтади. Бунга ҳам жиддий эътибор қаратамиз. Ундан кейин июнь ойида қисқа танаффус бўлади. Сўнгра иккинчи даврага ҳозирликни бошлаймиз. Бир нечта режа қилиб қўйганмиз, ҳаммаси аниқ бўлгач маълум қиламиз.
- Яқинда ниҳоясига етган Элит Осиё чемпионлар Лигасида Саудия Арабистонининг "Ал Аҳли" клуби ғолиб чиқди. "Нефтчи" ушбу мусобақада барибир Саудия клублари билан ўйнайди. Шунга кўра, рақибларни ўрганиш жараёни бошлаб юборилганми?
- Биз бу мусобақага ҳозирликни йил бошидаёқ бошлаганмиз. Элит ОЧЛ жуда нуфузли мусобақа. Ҳозирча рақибларни алоҳида ўрганганимиз йўқ, лекин умумий маънода Саудия, Қатар чемпионатларини кузатиб боряпмиз. Қуръа ташлаш маросимидан кейин рақибларни тўлиқ ўрганишни бошлаймиз.
