Илҳом Шарипов: «Хоразмда муҳим ғалабага эришдик»

- Илҳом ака, иродали ғалаба билан табриклаймиз. «Хоразм»га қарши учрашув ҳақида фикрингиз?

- Ўйин жуда ҳам оғир ўтди. Узоқ масофали йўлни босиб ўтганимиз боис, қолаверса, учрашув пайтида ҳаво анча иссиқ бўлганлиги жамоага таъсир ўтказмай қолмади. Чарчоқ аломатлари сезилсада, йигитлар майдонда борларини беришди. Ўйиннинг дастлабки дақиқаларидан ёмон ҳаракат қилмаган бўлсакда, пенальтидан ўтказиб юборилган гол режамизни бузди. Шунга қарамай, сўнгги дақиқаларгача ғалаба мақсадида тўп сурдик ва якунда йигитлар ирода кўрсатишди. Хоразмда муҳим ғалабага эришдик.

- «Динамо» ўйинидан қониқдингизми?

- Афсуски, бундай майдонларда чиройли ўйнаб бўлмайди, фақат натижа учун тўп суриш мумкин. Ҳар икки томон ҳам бир хил майдонда тўп сурганлиги боис, нолишга ҳожат йўқ. Ўйинимиздан қониқмаган бўлсамда, йигитлардаги самарадорлик ва курашувчанликдан қониқдим. Чунки, бундай майдонларда ўйлаганларингни амалга ошириш қийин.

- Беш тур якунларига кўра, «Хоразм»га қарши ўйин мавсумдаги энг оғир баҳс бўлди, дея оласизми?

- Хоразмда ғалабага эришдик, энди Нукусда ҳам шунга ҳаракат қиламиз. Умуман олганда, барча учрашувларимиз ўзига хос қийин ўтмоқда. Биринчи Лига бўлсада, ҳеч бир баҳсда осон бўлгани йўқ. Биз ҳар ўйинда фақат ғалаба учун интилаяпмиз. Ўйлайманки, турдан-турга жамоамнинг ўйини яхшиланиб боради. Жисмоний жиҳатдан ҳам яхшироқ формага кириб борамиз.

«Динамо» Матбуот хизмати.