Ғузорда Қашқадарё футболи фахрийлари ўзбек фахрийлари билан беллашишди

14 февраль куни Ғузорда “Шўртан” ҳамда Муборакнинг “Машъал” жамоалари ҳамкорлигида футбол фестивали ташкиллаштирилди. 

Ғузор “Марказий” ўйингоҳида вилоятимиз ва юртимиз футбол фахрийлари жам бўлишди. Футбол байрамидан олдин вилоятимиз футболи ривожи йўлида муносиб ҳисса қўшган фахрийлар “Шўртан” футбол клуби томонидан эсдалик совғалари билан тақдирланишди. Шунингдек, мамлакатимиз футболини ривожлантириш йўлида муносиб хизмат қилиб келаётган жамоамиз бош менежери Шамил Ярулин Ўзбекистон Футбол Ассоциацияси томонидан кўкрак нишони билан тақдирланди.

Тадбир ўзбек футболи фахрийлари қашқадарёлик футбол фахрийларига қарши майдонга тушишди. Голларга бой бўлган беллашувда 4:4 ҳисоби қайд этилди. Дўстлик ғалаба қозонди.

Футбол учрашувидан сўнг меҳмонлар “Шўртан” футбол клуби қошида футбол учун яратилган шарт-шароитлар билан яқиндан танишиб, ёшлар учун яратилган шарт-шароитлар юқори даражада эканлигини ва бундан унумли фойдаланган ҳолда жамоа Суперлигага чиқиши ва ўзбек футболи учун янгидан-янги номларни кашф этиш зарурлигини таъкидлаб ўтишди.

“Шўртан” ПФК матбуот хизмати