“Кириш сўзимда ҳам таъкидлаб ўтганимдек, биз бу лойиҳани мамлакатимиз мустақиллигининг 35 йиллигига бағишладик. Ҳурматли Президентимиз раҳнамолигида бугун Ўзбекистонда футбол мутлақо янги босқичга олиб чиқилди. Ўсмирлар ва ёшлар терма жамоаларимиз Жаҳон чемпионатларига йўлланма олди ва муносиб иштирок этди. Тарихда биринчи марта Францияда бўлиб ўтган Олимпиада ўйинларида қатнашдик. Спортнинг тизимли ривожлантирилиши натижасида ўтган йили Жаҳон чемпионатига чиқишга ҳам эришдик. Буларнинг барчаси сўнгги ўн йил ичида амалга оширилган ислоҳотлар, қолаверса, Президентимиз ва давлатимизнинг улкан қўллаб-қувватлови мевасидир.
Мазкур тадбир мустақиллигимизнинг 35 йиллигига бағишлангани сабабли, унга сарфланган маблағ ҳақида гапириш унчалик ўринли эмас. Очиқ айтиш керак, кимларнингдир хаёлида ноллар айланаётгандир, лекин бу сумма қанчалиги ҳақида айтмайман.
Эътибор берган бўлсангиз, кечаги ўйинлар учун чипталарнинг барчасини ҳам сотмадик. Асосий мақсадимиз – биринчи навбатда спортни оммалаштириш ва халқимизга том маънода байрам шукуҳини улашишдир. Биз бу тадбирдан ҳеч қандай иқтисодий манфаат кўзламаганмиз. Президентимиз биз тадбиркорлар учун жуда катта имкониятлар яратиб берганлар. Мен федерация раҳбари бўлиш билан биргаликда, тадбиркорлик билан ҳам шуғулланаман. Шу боис, ушбу тадбирни бизнинг ватанимизга ва халқимизга кичик байрам совғаси сифатида қабул қилишингизни сўрайман”, – деди Маматқулов.
