Дембеле атрофидагилар "Олтин тўп" сабаб футболчининг маоши Неймар ва Мессиникидек бўлиши керак деб ҳисобламоқда

Ҳозирда форвард ПСЖда энг юқори маош олувчи футболчи ҳисобланади — солиқлардан олдин ойига 1,5 миллион евро, яъни йиллик 18 миллион евро. Capology маълумотларига кўра, солиқ тўланганидан сўнг у йилига тахминан 10 миллион еврони қўлига олади.

Дембеленинг атрофидагилар бу талабни унинг спортдаги катта ҳиссаси билан изоҳлашмоқда — ўтган мавсумда у барча мусобақаларда 53 ўйинда 35 гол урган ва 16 ассист қайд этган. Шунингдек, сўнгги икки мавсумда жамоада муҳим рол ўйнагани ҳам таъкидланмоқда.

ПСЖ раҳбарияти Дембеленинг ҳозирги маоши унинг янги мақомига тўлиқ мос эмаслигини тан олса-да, бюджетни ортиқча кенгайтириш нияти йўқ. Клуб фикрича, Дембеленинг «Олтин тўпи» — бутун жамоанинг саъй-ҳаракатлари натижаси.

Шунинг учун Париж клуби унинг маошини Лионель Месси ва Неймар ПСЖдаги йилларида олган даражагача (яъни солиқлардан кейин йилига тахминан 30 миллион евро) ошириш вариантларини рад этган. Клуб аввалги хатоларни такрорламаслик ва молиявий фэйр-плей талабларини инобатга олишни мақсад қилган.