Бугун футбол. Охирги тўрт ўйинда 12та гол урган "Пахтакор" амалдаги чемпионга қарши

Мамлакатимизнинг амалдаги чемпиони "Локомотив" ўз майдонида "Пахтакор"ни қабул қилади. Бу тўқнашувга ортиқча таъриф бериш шарт бўлмаса керак. Жамоаларнинг турнир жадвалида эгаллаб турган ўрнидан қатъий назар бугун ТТЗдаги "Локомотив" стадионида қизиқарли баҳс кечиши кутилмоқда. 

Иккала жамоа ҳам иккинчи даврада ҳозирча бештадан ўйин ўтказди. "Локомотив" шундан учтасидан ғалаба қозонган бўлса, "Пахтакор" ҳам шунча ўйинда ютуққа эришди. "Локомотив" уйда "Шўртан", сафарда эса "Сўғдиёна" ва "Металлург" клубларини мағлуб этди. "Пахтакор" эса ўз майдонида "Нефтчи" билан "Шўртан", сафарда "Металлург" клубларидан устун келди. 

Биласизми? "Локомотив" иккинчи даврада уй ўйинларида биттадан кўп гол ура олмаяпти. Бу жамоа ўз майдонида "Машъал" билан 1:1 ўйнаган бўлса, "Шўртан"ни зўрға 1:0 ҳисобида мағлуб этди. 

Кўпчиликни қизиқтираётган савол: "Пахтакор" Шота Арвеладзе бошчилигида кучайишга эришдими? Ўйлаймизки, бу саволнинг жавобини бугунги ўйиндан сўнг билиб оламиз. Чунки "Пахтакор" бунгача ғалаба қозонган ўйинларда рақиблар унчалик кучли эмасди. "Пахтакор" сафарда "Қизилқум" ва "Динамо" каби ўртамиёналарни енга олмади, шундай бўлса-да, жамоа "Локомотив" майдонида уч очкони қўлга кирита олармикан... 

Қолаверса, Арвеладзенинг "Локомотив" "Пахтакор" учун ашаддий рақиб эканлигидан хабари борми? Агар мураббий бу ҳақда билса ва шогирдларини шунга яраша руҳлантира олса, демак кураш янада қизғин кечади. Бундан ташқари, "Пахтакор" таркибига келиб қўшилган легионерлар ҳам қанчалик даражада кучли эканликларини мана шу ўйинда кўрсатишлари керак. 

Четдан қараганда "Локомотив"нинг иккинчи даврадаги ўйини кучсизлангандек кўринмоқда. Лекин бу алдамчи таассурот бўлиши ҳам мумкин. Масалан, "Локо" бугун зафар қучса навбатдаги чемпионлик учун яна бир катта қадам ташлайди. Жамоа таркибида йўқотишлар бор, хусусан Марат Бикмаев, Шуҳрат Муҳаммадиев ва Садриддин Абдуллаев турли сабабларга кўра ушбу учрашувни ўтказиб юборишади.