Ботир Қодирқулов: "Яна катта футболга қайтмоқчиман"

Одатга айланиб қолган футболчиларнинг ўйинолди фикрлари билан танишиш ўрнига бугунги  “Нефтчи” – “Шўртан” учрашуви олдидан жамоамизнинг собиқ футболчиси ва эндинги ёрдамчи мураббийи – Қодирқуловнинг футболчи сифатида ушбу ўйинга қарашлари ҳақида маълумот беришга қарор қилдик.

- Мураббийлик, футболчиликдан анча маъсулиятли ва мураккаб иш эканлигини энди англаб етаяпман. Ҳозирги ҳолатимда майдонга тушиб жамоамга ёрдам бериш истаги кундан-кунга кучайиб бормоқда. “Шўртан”нинг мавсумни бу қадар омадсиз бошлаши мени ҳам кўпчилик қатори жуда ҳам ўйлантирмоқда. Худо хоҳласа, соғлиғимни тиклаб олсам, иккинчи даврада Раҳбарият билан маслаҳатлашган ҳолда майдонга қайтмоқчиман.

- “Шўртан”нинг ўйинларига тўхталадиган бўлсам, жамоамиз ёмон ўйнаяпти дея олмайман. Йигитлар астойидил ҳаракат қилишмоқда. Ўйинолди машғулотларни ҳам бор куч ва ғайратлари билан ўтказишмоқда. Ўйинларда ҳам жамоамиз кўплаб вазиятларни содир қилишга эришаяпти, аммо нима сабаб билмадим-у, якунловчи ҳолатларни самарали якунлай ололмаяпти. Жамоадошларимнинг ғалабага ва натижани қўлга киритишга иштиёқи баланд. Гарчи сўнги учрашувда “Локомотив”га ютқазган бўлсакда ана шу иштиёқ ўйин давомида кўриниб турди. Буни майдонга ташриф буюрган мухлисларимизнинг учрашувнинг сўнги дақиқаларига қадар кузатиб, жамоамизни қўллаб-қувватлаганидан ҳам билсак бўлади. Таркибимизда ажойиб футболчилар бор. Ишончим комил, йигитларнинг ҳаракати ва юқорида айтиб ўтганимдек, иштиёқи  бугун Фарғонада ўзининг ижобий натижасини беради – деди Ботир Қодирқулов ўз фикр ва мулоҳазаларини якунлаб.

"Шўртан" матбуот хизмати