"Бенфика" ходимлари "Реал" кийиниш хонасига бостириб киришга уринган экан

Ўйиндан сўнг стадионнинг трибуна ости йўлагида ҳақиқий тартибсизликлар юзага келди.

Можаро нимадан бошланди?

Ўйиннинг иккинчи бўлимида Винисиус Жуниор рақиб футболчиси Жанлука Престианнини ирқчиликда айблади. Бразилиялик юлдузнинг таъкидлашича, Престианни оғзини футболкаси билан тўсган ҳолда уни "маймун" деб ҳақорат қилган. Бу воқеадан сўнг стадиондаги маҳаллий мухлислар Винисиусни ҳар гал тўпга тегганда ҳуштаклар билан "сийлашди".

Моуриньюнинг ғазаби ва қизил карточка:

85-дақиқада Жозе Моуринью майдондан қувилди. Бунга Винисиуснинг "Бенфика" ярим ҳимоячиси Ричард Риосга ишлатган қўполлиги сабаб бўлди. Моуринью бразилиялик футболчига иккинчи сариқ карточка берилмаганидан (Винисиус голни бурчак байроқчаси ёнида рақс тушиб нишонлагани учун аввалроқ огоҳлантирилган эди) қаттиқ норозилик билдирди.

Кийиниш хонасидаги тўқнашув:

"CBS Sports" нашрининг хабар беришича, финал ҳуштагидан сўнг вазият янада кескинлашган:

"Бенфика" ходимлари мадридликларнинг кийиниш хонасига бостириб киришга ҳаракат қилишган.

Трибуна ости йўлагида икки жамоа вакиллари ўртасида оммавий тўқнашув юз берган.

Хавфсизлик ходимлари вазиятни назоратга олиш учун катта куч сарфлашига тўғри келган.

Мадриддаги жавоб ўйини олдидан муҳит ҳаддан ташқари қизиб кетган. УЕФА ушбу воқеалар юзасидан қатъий чоралар кўриши кутилмоқда.