"Бавария" футболчисининг Германияга ёзган таъсирли мактуби

"Бавария" ҳужумчиси Сандро Вагнер гарчи терма жамоадан четга қолган бўлсада жамоадошларига омад тилади.

"Германия терма жамоасидаги азиз инсонлар, Сизлар учун ниҳоят Жаҳон чемпионатини бошлаб берадиган Мексикага қарши ўйинга саноқли соатлар қолмоқда. Мен эса сизларни қўллаб-қувватлаш учун таътилимни эрта якунламоқдаман. Бутун Германия сизларга мухлислик қилиш учун шай! Мен ҳар қандай ҳолатда ҳам сизлар билан биргаман. Тўғри, мен рақиб жарима майдончаси ичида бўлиш ўрнига уйимдаги боғдаман. Аммо масофа муҳим эмас. Мен Германия терма жамоасининг бир бўлаги бўлганимдан фахрланаман. Сизларга эса яқин 3-4 ҳафтада улкан омад ёр бўлишини тилайман. Жаҳон Кубогини яна бир бор уйга ўзингиз ва биз учун олиб келинглар!

P.S. Мени "Бавария"даги дўстларим диққатига: Мен Жаҳон чемпионатидаги олтин медални эсдалик совға сифатида қабул қилиб олишга тайёрман. Шунда ўзимни жуда бахтли ҳис этардим", - деб ёзади Сандро Вагнер.