Башар Ресан: "Ўзбекистон тўғридан-тўғри жаҳон чемпионати йўлланмасини қўлга киритади"

"Бугун жуда оғир кун бўлди. Биз жуда кучли жамоага қарши ўйнадик. "Хоразм" тактик жиҳатдан ҳам, жисмоний жиҳатдан ҳам жуда кучли эди. Биринчи бўлимнинг дастлабки дақиқаларида хатолик туфайли гол ўтказиб юбордик, футболчиларнинг эътиборни бироз сусайтиришганди. Лекин яхшиямки, ўзимизга келиб, керакли голларни урдик. Сўнгги дақиқаларгача уч очкони қўлга киритиш учун ҳаракат қилдик. Энг муҳими, бу ўйинда ғалаба қозондик ва мухлисларимизни хурсанд қилдик.

Биз бир жамоамиз ва доимо биргамиз. Мақсадимиз фақат уч очко олиш, ким гол урди ёки ким ёрдам берди, бу муҳим эмас. Барча ўйинчилар – захирада ўтирганлар ҳам, майдонда ўйнаганлар ҳам бир хил даражада ва ҳар бир ўйинга тайёр. Шунинг учун биз хурсандмиз. Ғалабада жамоавий куч муҳим рол ўйнади.

Менимча, Ўзбекистон тўғридан-тўғри жаҳон чемпионати йўлланмасини қўлга киритади. Уларга омад тилайман. Уларнинг имкониятлари жуда юқори. Ироққа келсак, бизни Жанубий Корея ва Иорданияга қарши жуда мураккаб ўйинлар кутмоқда. Бу вазифани бажариш осон бўлмайди. Умид қиламанки, Ироқ ҳам тўғридан-тўғри жаҳон чемпионатига йўл олади. Агар бунинг иложи бўлмаса, плей-оффда яна бир имкониятимиз бор", деди ироқлик футболчи.

Оқил Абдубарноев суҳбатлашди.