Баҳодир Аҳмедов терма жамоадаги йўқотишлар ва Озарбайжонга неча нафар ўйинчи олиб кетиши ҳақида гапирди

Кечаги машғулотлар ҳақида бироз аввал батафсил маълумот берган эдик. Қуйида эса бош мураббий Баҳодир Аҳмедовнинг фикрларини ўқишингиз мумкин.

Фото Футзал. Ўзбекистон МТЖ таркибида йўқотишлар бор, кечаги машғулотдан ГАЛЕРЕЯ

"Машғулотлар кўнгилдагидек давом этаяпти. Фақатгина Даврон Чориевда жароҳат бор ва машғулотларда иштирок эта олмаяпти. Ҳозирча у индивидуал тарзда шуғулланмоқда. Қолган ҳамма соғ-саломат ва улардан кўнглим тўқ", - дея фикрларини бошлади Б.Аҳмедов.

- Чориев ўнг оёқ суяги дарс кетиши сабаб Озарбайжонга бормаслиги аниқ бўлибди. У Осиё чемпионатига қадар сафга қайтишга улгурадими?
- Терма жамоа шифокорлари билан бу борада суҳбатлашдик. Улар менга Даврон қитъа биринчилигига қадар тикланишга улгуриши айтишди. Шунга умид қиламиз.

- Бугунги машғулотда Жавлон Аноров ҳамда Артур Юнусов кўринмади. Сабаб?
- Жавлон шахсий сабабга кўра эрталабки машғулотни ўтказиб юборди. Кечқурунги машғулотда у яна биз билан бирга бўлади. Артур эса жароҳати борлиги сабаб терма жамоа ихтиёридан кетди. Лекин, у Осиё чемпионатига бориши мумкин бўлган ўйинчилар 25талигида қолади.

- Озарбайжонга неча нафар футзалчи олиб кетилади?
- Бокуга 15 нафар футзалчини олиб кетамиз. Улардан икки нафари дарвозабон, 13 нафари ўйинчи бўлади.

Эслатиб ўтамиз, Туркманистон мезбонлик қиладиган Осиё чемпионати шу йилнинг 12 сентябрдан 4 октябрга қадар Литвада ўтказиладиган Жаҳон чемпионатига йўлланма беради.