Артём Петросян: "Оддий вазиятларда тўпни йўқотяпмиз. Ҳамма ишлаган режаларимизни эсдан чиқариб юбордик"

"Жуда оддий мағлубиятга учрадик. Афсуски, биринчи бўлимда ҳеч нарса ўхшамади. Рақиб ғалаба қозонмади, ўзимиз уларга бу борада ёрдам бериб, ютқаздик. Танаффусда қаттиқ гапирдик. Шундан сўнг яхши тарафга сал ўзгариш бўлди. Алмаштиришдан кейин яна озгина босим ҳам уюштирдик, бироқ кейин яна дарвозамиздан тўп олиб чиқдик. Билмайман, қандай қилиб таҳлил қилиш мумкин. Ҳеч нарса ўхшамади. Оддий вазиятларда тўпни йўқотяпмиз. Бир-икки кун олдин машғулотларда ҳаммаси ўхшаётганди. Яхшиси, машғулотда эмас, ўйинда ўхшасин. Ҳамма ишлаган режаларимизни эсдан чиқариб юбордик. Бошқа гапим йўқ", – деди Петросян. 

- Нима деб ўйлайсиз, бу йигитларнинг тажрибасизлиги билан боғлиқми?

- Ҳам тажриба, ҳам қанақадир тезлик етишмаяпти. Балки ўйиндан олдин учрашувни ютиб бўлдик, деган туйғу билан майдонга чиқишдими, ҳамма муаммо шундан бошланди. "ФарДУ" прессинг қилмади, бемалол ўйнаб, биз хато қилишимизни кутди, биз ҳам уларга ёрдам бериб юбордик. Кўрамиз, ўйинни бошидан томоша қилиб, бир қарорга келсак бўлади. Машғулот ва ўйинда умуман бошқача кўриниш. Гўё футболчилар алмашиб қолгандай.