Бу ҳақда АҚШ Конгрессидаги Демократия партияси вакили The Athletic порталига маълум қилди.
Июль ойида ТАСС агентлиги АҚШ Конгресси Вакиллар палатаси аъзоси Жейми Раскин Инфантинога нисбатан тергов бошлагани ва унга Оқ уй ҳамда АҚШ президенти Дональд Трамп билан алоқалари тафсилотларини ошкор этишни талаб қилиб хат йўллагани ҳақида хабар берган эди.
"ФИФА қўмита томонидан сўралган бирорта ҳам муҳим ҳужжатни, жумладан, ФИФА Трамп оиласига қанча маблағ ажратганини кўрсатувчи маълумотни ҳалигача тақдим этмади. Шунингдек, ташкилот ФИФА Тинчлик мукофотининг берилиши билан боғлиқ асосий саволларга жавоб бермади ва Кушнер-Инфантинонинг жаҳон чемпионатини сотиш бўйича схемаси қандай пайдо бўлганини тушунтириб бермади. Бугунги кунда ФИФА билан ҳамкорлик даражаси жуда ҳам паст ва қониқарсиз", — деди Конгресс вакили.
Эслатиб ўтамиз, июль ойида Инфантино ташкилотнинг эркаклар ва аёллар ўртасидаги асосий мусобақаларини назорат қилувчи компания тузишни хоҳлагани маълум бўлган эди. Унинг фикрича, FIFA Forward Enterpriseнинг ташкил этилиши ФИФАга аъзо ассоциацияларнинг фойдасини ошириб, жаҳон футболи ривожига ҳисса қўшган бўларди. Халқаро футбол федерацияси бу схема 4,2 миллиард доллар маблағ жалб қилиши мумкинлигини билдирганди. Бироқ мазкур ташаббус функционерлар, федерациялар ва бошқа ташкилотлар томонидан кескин танқид ва қоралашларга учраган эди.
2026 йилги жаҳон чемпионати вақтида АҚШ терма жамоаси ҳужумчиси Фоларин Балогун Босния ва Герцеговинага қарши кечган 1/16 финал учрашувида (2:0) ҳимоячи Тарик Мухаремовичга қарши қўполлик ишлатгани учун қизил карточка олган эди. 5 июль куни ФИФА Интизом қўмитаси Балогуннинг дисквалификациясини вақтинча тўхтатди. Кейинроқ журналист Бен Жейкобс ФИФА бу қарорни Оқ уйдан Жанни Инфантинога қўнғироқ қилишганидан кейин қабул қилганини хабар қилди. Трампнинг ўзи ҳам Инфантинога бу масала юзасидан қўнғироқ қилганини ва футболчининг дисквалификациясини қайта кўриб чиқишни сўраганини тасдиқлаган.
