Анвар Бердиев: "Футболчиларимизда ўзига бўлган ишонч етишмади"

"Бугун эрта гол ўтказиб юбордик ва футболчиларимиз гўёки чарчаб қолишгандек кўринишди. Ягона ўйин тақдирини ҳал этди. "Пахтакор" жамоасини ғалаба билан табриклайман", - дея фикр билдирди Анвар Бердиев бугунги учрашув ҳақида.

- "Шўртан"га вазиятларни яхши якунлай оладиган ҳужумчи етишмаётгандек...

- Биз ўз имкон даражамиздан келиб чиқиб футболчиларни таклиф этдик. Футболчиларимизга ўзига бўлган ишонч етишмаётгандек. Футболчиларимиз ҳали ёш ва кейинги учрашувларда камчиликларни тўғрилаймиз. Кейинги учрашувларни Ғузорда ўтказамиз.

- Жамоангиз бугун фақатгина қанотдан оширилган паслар орқали ҳужум қилди, рақиб дарвозабони эса бундай пасларни осонлик билан бартараф этди. Айнан мана шундай вазиятда жамоага лидер етишмагандек туюлди...

- Вақт кам қолгани учун футболчиларимиз шошиб қолишди. Шахсан мен ҳам бундай футбол ўйнашга қаршиман. Устига-устак йигитлар чарчаб қолишди ҳам. Гапингиз тўғри, узун паслар рақиб дарвозабонига қулайлик яратиб берди.

- Бугун "Пахтакор" омад эвазига ғалаба қозонди деб ўйлайсизми?

- Омад ҳам кучлиларга кулиб боқади. Ўтган турда "Пахтакор" энг кучли жамоалардан бири "Нефтчи"ни сафарда йирик ҳисобда мағлуб этиб келди. Айтганимдек, футболчиларимизга бироз ишонч етишмади.