- Ўйин ҳақида фикрингиз?
- Ўз майдонимиздаги иккита баҳсда ғалаба қозона олмадик. Аввалига "Бухоро" билан, бугун "Динамо" билан дуранг ўйнадик. Биринчи таймни тўлиқ назорат қилдик, устунлик тўлиқ биз томонда бўлди. Баҳс тақдирини 35 дақиқа ичида ҳал этиб қўйишимиз мумкин эди.
Вазиятларни голга айлантириш керак эди, холос. Мен йигитларга иккита вазият бўлса иккита, учта бўлса учта гол уринглар дедим. Тўғри, мантиқан битта чиройли гол урдик, лекин шу билан тўхтаб қолдик.
"Динамо" биринчи бўлимда ҳеч нарса қила олмади. Балки уларнинг тактикаси шундай бўлгандир, бу уларнинг муаммоси. Танаффусда футболчиларга яна қўшинглар деб айтдим. Лекин бунинг ўрнига ишончсизлик кетди. Шунчаки олиб келиб қўйдик. Рақиб футболчиси вазиятдан усталик билан фойдаланди. Футболчида маҳорат бўлмаса шунча машғулот ёки теория ўтказишнинг фойдаси йўқ. Демак, ўйинчи чемпионат савиясига мос келмаяпти.
- Захирадан тушган Гадоев, Соҳибжонов ва Табатадзе ўйинни кучайтира олишмади. Уларга эътирозингиз борми?
- Улар томонидан креативлик кўрмадим. Ўйинга ҳеч нарса қўша олишмади. Ҳаракат бўлди, лекин қўша олишмади. Мен аслида захирадан ўйинчиларни туширмоқчи ҳам эмасдим. Шунга мажбур бўлдик. Майдондагилар ўзи шундоқ ҳам яхши ўйнаб турганди. Афсуски, баъзилар Суперлига даражасига мос келмаяпти, лекин шулар билан ишлашга мажбурмиз. Бу бизнинг ишимиз, нима қилайлик, балансни ушлашга ҳаракат қиляпмиз. Афсуски, ҳужумда деярли ҳеч нарсамиз ўхшамади.
- "Динамо"да Ҳожимирзаев ўйнамади, яна икки нафар футболчиси терма жамоага кетган. Сиз икки очко йўқотдик деб ҳисоблайсизми?
- Ҳа, биз икки очко йўқотдик. "Бухоро" билан ўйинда ҳам йўқотгандик. Рақибда ўйинчилар ўйнамаган бўлса, бошқалар ҳаракат қилди. Биз ўз муаммоларимизни гапиришимиз керак. Насимов ҳам майдонга тушди, унинг қачон охирги марта ўйнаганини эслай олмадим. У ҳам ҳаракат қилди. Тўғрисини айтсам, уларда бу ўйинчилар йўқлигини билмасдим. Бизда ўзимизнинг муаммолар етарли.
