Ўйиндан кейин "Қўқон-1912" бош мураббийи Андрей Шипилов матбуот анжуманида иштирок этди.
- Ўйин ҳақида фикрингиз?
- Учрашувни яхши бошладик, чиройли гол урдик, лекин шундан кейин жамоамизга нима бўлди билмайман. Бу мавсум шунча ўйин ўтказиб, бундан қийин вазиятлардан чиқиб кета олгандик. Лекин бугун ўзимизни кўрсата олмадик. Менимча, гол уриб олгач осонлик билан ғалаба қозонамиз деб ўйладик. "Қизилқум" ўзига хос жамоа ва ўз ўйин услуби бор. Бу ҳақда футболчиларга айтгандим, кўпчилиги қулоқ солмаган шекилли. Ҳаммасини тушунтириб бергандик.
Биз эса рақибга имкониятни бериб қўйдик. Захирадан футболчиларни туширдик, ҳужумга кўпроқ урғу бердик, аммо ўз мақсадимизга эриша олмадик. Рақибни ҳақли ғалаба билан табриклайман. Ўйиндан кейин футболчиларга ишга бундай муносабатда бўлиш керак эмаслигини айтдим. Ҳали баҳсни яна таҳлил қилиб чиқамиз.
- Тўп билан муомала, тўп узатишлар бўйича жамоангиз яхши ўйин кўрсатди, лекин дарвоза томон деярли зарба бермади. Бу нима билан боғлиқ?
- Рақибни ўрганиб чиққандик. "Қизилқум" ҳимояда жипс ҳаракат қилишини билардик. Ҳозирги футболда ўйинни назорат қилиш билан тўпни назорат қилиш ўртасида фарқ катта. Тўпни назорат қилиб ўйинни назорат қилмаслик мумкин. Рақиб иккинчи рақам бўлиб ўйнади ва ўз имкониятини кутди.
Футболда 10та, 20та имконият бўлмаслиги, аксинча бир-иккита вазият бўлиши мумкин. Ҳамма гап шундан фойдаланишда. Бизда имконият бўлди, лекин тўп кирита олмадик. Рақиб узун тўп узатишлар орқали ўйнашини билардик, бундай вазиятда майдонга чиқиб фақат курашиш керак. "Қизилқум" бизни шу билан жазолади.
Характер кўрсата олмадик. Ҳамма уч очко олишни хоҳлаяпти. Мен ҳам футболчиларга бугун уч очко олиш керак, чиройли ўйинни унутинглар дедим. Қўқонга қайтиб боргач бошқатдан кўриб чиқамиз, лекин бунга кам вақт бўлади, чунки ўйинлар ораси тез бўляпти. Суперлигада навбатчи баҳслар йўқ. Ким характер кўрсатса шу ютиб кетяпти. Ҳозирги футболда 10 карра чемпион каби номлар роль ўйнамай қўйди. Майдонга чиқиб курашиш керак. Курашмасдан ютиб бўлмайди. Мен учун бу мағлубият жуда уятли бўлди.
