Аргентинадан учралган мағлубиятдан сўнг Эквадор термаси устози Феликс Санчес истеъфога чиқарилди

Эквадор футбол федерацияси Америка Кубоги чорак финалида Аргентинадан учралган мағлубиятдан бир неча соат ўтиб мутахассис билан хайрлашганини эълон қилди. Асосий вақт 1:1 ҳисобидаги дуранг билан якунланган бўлса, пенальтилар сериясида аргентиналиклар кучлироқ чиқди (4:2).

"Бугун бош мураббий Феликс Санчес Бас билан шартномани бекор қилиш бўйича келишувга эришилди. Феликс ва унинг мураббийлар штабига меҳнати ва профессионаллиги учун миннатдорлик билдирамиз ва келажакдаги лойиҳаларида муваффақиятлар тилаймиз", – дейилади федерация баёнотида.

48 ёшли испаниялик мутахассис Эквадор терма жамоасини 2023 йилнинг март ойидан буён бошқариб келаётганди. Бас бошчилигида терма жамоа 19 учрашувдан 10 тасида ғалаба қозонди, 6 марта мағлубият аламини тотиб кўрди ва 3 бор дуранг ўйнади.

Феликс Санчес ўзбекистонлик футбол ишқибозларига яхши таниш. У бир неча йил мобайнида Қатар мамлакатида фаолият юритиб, терма билан 2019 йилда Осиё Кубогида зафар қучган.