Али Хамам: “Бизни ғалабадан бошқа нарса қаноатлантирмас эди”

Ушбу учрашувдан сўнг “Зобоҳан” клуби футболчиси Али Хамам ўз фикрларини билдирди.

“Аввалам бор “Бунёдкор” билан бўлган учрашувда ғалаба қозонганимиздан хурсандман. Биз Тошкентга фақат ғалаба қозониш учун ташриф буюргандик. “Бунёдкор” гуруҳимиздаги кучли жамоа, аммо ушбу баҳсда “Зобаҳан” жуда ҳам ажойиб ўйин намойиш қилди. 

Рақибимизни ўз уйида 2:0 ҳисобида мағлубиятга учратдик. Энди бор эътиборимизни кейинга баҳсга қаратамиз. Насиб қилса қолган учрашувларда ҳам ғалаба қозониб “плей-офф” босқичига чиқамиз. “Бунёдкор” ҳақида гапирадиган бўлсам, рақибимизга нима бўлганини ўзим ҳам билмайман. 

Уларнинг асосий таркибдаги айрим футболчилари учрашувда иштирок этмади. Биз эса кучли ўйин кўрсатдик ва ғалаба қозондик. Шунинг учун ҳам “қалдирғочлар” мағлубиятга учрашди, деб ўйлайман. Биз майдонга фақат ғалаба учун тушган эдик. 

Барча билади, бундан олдинги 2та учрашувнинг бирида мағлубиятга учрадик, иккинчисида дуранг натижа қайд этдик. “Бунёдкор”га қарши ўйинда, худди финал баҳсидек ҳаракат қилдик. Бизни ғалабадан бошқа нарса қаноатлантирмас эди”, - дейди “Зобоҳан” футболчиси Али Хамам.

Жаҳонгир Сотволдиев ёзиб олди