Алаба "Реал"дан янги шартнома хоҳламоқда, клуб эса йўқ

"Реал Мадрид" ҳимоячиси Давид Алаба клубда қолишни хоҳлайди, бироқ бунинг эҳтимоли паст, дея Х ижтимоий тармоғида инсайдер ва журналист Флориан Плеттенберг хабар бермоқда. 33 ёшли футболчининг клуб билан шартномаси 2026 йил ёзигача амал қилади.

Манба маълумотларига кўра, Алаба "Реал" билан янги келишувга эришиш учун курашмоқда. Давид жамоада етакчи ҳисобланади ва у жамоада ҳурмат қозонган. Таъкидланишича, ҳозирги вақтда клубнинг футболчи билан шартномани узайтириши жуда кам эҳтимолга эга. Давид эркин агент бўлиши мумкин, аммо австриялик ҳозирча фаолиятини якунлаш ҳақида ўйламаяпти.

Ҳимоячи "Реал" сафида 2021 йил ёзидан бери тўп сурмоқда. Шу давр мобайнида Алаба барча мусобақаларда 116 та ўйинда иштирок этиб, бешта гол урди ва тўққизта голли узатма берди.