Африка Миллатлар Кубоги. Салоҳ гол урди, Миср эса қўшимча таймларда Бенин тўсиғидан ўтди

"Адрар" стадионида кечган баҳсда "фиръавнлар" қийинчилик билан ғалабани қўлга киритиб, чорак финал йўлланмасига эга чиқишди.

Учрашувнинг асосий вақтида жанговар дуранг қайд этилди. 70-дақиқада Марван Аттия ҳисобни очган бўлса, 83-дақиқада Жодел Доссу мувозанатни тиклаб, бенинликларга умид бағишлади.

Бироқ қўшимча таймларда Миср терма жамоаси ўз тажрибасини намойиш этди. 97-дақиқада Яссир Иброҳим жамоасини олдинга олиб чиққан бўлса, экстра-таймлар якунида жамоа сардори Муҳаммад Салоҳ якуний нуқтани қўйди — 3:1.

Африка Миллатлар Кубоги-2025. 1/8 финал 

МИСР — БЕНИН 3:1 (қўшимча таймларда)

Голлар: М. Аттия (70), Я. Иброҳим (97), М. Салоҳ (120+4) — Ж. Доссу (83).

Миср: Эл-Шенави, Ҳани, Я. Иброҳим, Рабиа, Ҳамди, Аттия, Фатҳи, Одил, Салоҳ, Мармуш, Трезеге.

Бенин: Данжину, Уору, Вердон, Тижани, Роше, Имуран, Самаду, Тосин, Додо, Олайтан, Мунье.

Шу тариқа, 7 карра қитъа чемпиони бўлган Миср чорак финалга йўл олди. Энди улар Кот-д’Ивуар — Буркина-Фасо жуфтлиги ғолибига қарши майдонга тушишади.