Абдумавлон Абдужалилов: "Муваффақиятсизликда айбдор битта бўлмайди. "Бунёдкор" олдига юқори мақсад қўйилган. Гапда эмас, амалда кўрсатишга ҳаракат қиламан"

Абдумавлон Абдужалилов 2019-2020 йилларда "Бунёдкор" шарафини ҳимоя қилган. Кейинги 4 мавсумни "Локомотив"да ўтказган кипер энди "қалдирғочлар" дарвозасини қўриқлайди.  

- "Бунёдкор" сиз учун бегона жамоа эмас. Собиқ клубингизга қайтиш қандай юз берганини айта оласизми?

- "Бунёдкор" раҳбариятидан Мурод ака Алиев таклиф билан чиқдилар. Ўзаро келишган ҳолда бир тўхтамга келдик. Бирга ишлаш таклифини билдиришди. "Бунёдкор" Суперлигада жон сақлаш учун курашган бўлсада буни такрорламаслик учун яхши жамоа қуришаётганини айтишди. Мураббий билан ҳам гаплашиб олдик. Жамоа олдига яхши мақсадлар қўйилган. 

- Сиз ўйнаган давр билан охирги 3 йиллик катта фарқ қилди. Натижалар қандай таассурот қолдирди?

- Ўзим учун бегона жамоага ўтмадим. Бу ерга 2019 йил биринчи маротаба келишимга Мурод Алиев сабабчи бўлгандилар. Ўшанда бош директор сифатида фаолият олиб борардилар. Миллий терма жамоага ҳам 2019 йил таклиф қилинганман. Мақсадим терма жамоага қайтиш. Олдига олий мақсад қўйган жамоада ўйнаш хоҳиши бор эди. Бу йил "Локомотив", "Бунёдкор" ўзига мос бўлмаган ўринларда юрди. Бунга сабаблар бор эди. "Бунёдкор" бир неча бор Ўзбекистон чемпионлигини қўлга киритган. Жамоани ўз мавқеига қайтариш ниятидамиз. 

- "Темирйўлчилар"нинг бир йилдан сўнг яна Про лигага равона бўлишида қандай камчиликлар сабаб бўлди?

- "Локомотив" билан муваффақиятсиз мавсум бўлди. Жамоа 2022 йил Про лигага тушиб кетганида бирга Суперлигага қайтаришни мақсад қилгандим. Ниятимизга эришдик. Мавсумни яхши натижалар билан бошладик. Муваффақиятсизликка сабаб битта бўлмайди. Кўп нарсаларни йиғиндиси шунга олиб келади. Буни 2022 йилда ҳам айтганман. Битта одамнинг айби ҳисобланмайди. "Локомотив" олдига Суперлигага қайтиш вазифасини қўйган. Қўлдан келганча жамоага ёрдам беришга ҳаракат қилдик. Уларга омад тилаймиз. Мазкур клубда 4 йил ўйнадим. Жамоадагилар мендан хафа бўлмади деган умиддаман. 

- Жамоавий кўрсаткичлардан ташқари ўзингизга қандай вазифа қўйдингиз?

- Суперлига жамоасида ўйнаш мақсадини қўйганман. Юқорида айтганимдек миллий жамоага таклиф қилинишим фақат гапда эмас, амалда кўрсатиш учун бор кучим билан ишлайман. "Бунёдкор"га бежизга келмаганимни, юқори ўринларни эгаллашга ҳиссамни қўшишимни кўрсатишга астойдил бел боғлаганман. Шу ўринда  "Локомотив"дан ҳам миннатдорман.