Суперлига–2025. Эксперт хулосаси: "Насаф" селекцияда ютқазди, "Нефтчи" эса кутилмаларни оқлади

Чемпионлик кураши, айрим жамоаларнинг кутилган натижани беролмагани, бошқаларининг эса барқарорлик ҳисобига олдинга чиққани мавсумнинг асосий мавзуларига айланди. Қуйида футбол мутахассиси, эксперт Улуғбек Мирзаевнинг Суперлига-2025 мавсуми бўйича таҳлилий фикрлари келтирилади.

— Ўтган мавсум қанчалик мавсум олдидан кутган кутилмаларингизни оқлай олди? 

— Мавсум олдидан "Нефтчи", "Пахтакор" ва "Насаф" жамоалари чемпионлик учун асосий даъвогар сифатида тилга олинган эди. Қолган клублар медаллар учун кураш олиб бориши, рақобатни кучайтириши кутилган. Қайсидир маънода бу тахминлар ўзини оқлади. Хусусан, "Нефтчи" чемпионлик учун муносиб таркиб йиғди ва осон бўлмаса-да, қийинчилик билан олтин медалларни қўлга киритди. Иккинчи давранинг охирларига келиб "Нефтчи" турнир жадвалида пешқадамликни қўлга олди. Бунда, биринчи навбатда, "Насаф"нинг селекция ишларини етарлича самарали олиб бормагани ҳамда "Пахтакор"нинг Суперлига шароитини яхши билмайдиган Педру Морейра каби мураббийни таклиф этгани, стартда кўп очко йўқотгани ҳал қилувчи омил бўлди. Шу ҳолатлар якунда "Нефтчи" фойдасига ишлади.Бироқ чемпионликни фақат рақибларнинг очко йўқотиши билан боғлаш нотўғри бўлар эди. Айниқса, иккинчи давра олдидан Кожо, Нимели ва Одилов каби футболчилар билан кучайгани "Нефтчи"га ҳал қилувчи устунлик берди.

— Про лигадан чиққан жамоалар анча муаммоларга дуч келишди ва қийинчилик билан ўринларини сақлаб қолишди...

— "Шўртан" ҳақиқатан ҳам қийналди. Суперлига ўйинлари шуни кўрсатдики, плей-оффда қатнашган "Қўқон-1912", "Машъал", "Бухоро" ва "Хоразм" каби жамоалар билан элита ўртасида фарқ катта. Ўтган мавсум икки лига ўртасидаги тафовутни яққол намоён қилди.

— Тошкент клублари учун мавсум аввалги йиллардан фарқли яхши ва барқарор ўтди дейиш мумкин. Бунда асосий сабаб тўғри иш олиб борилганидами ёки бошқа омиллар таъсирими?

— "Бунёдкор"да маълум маънода барқарорлик кузатилди. Аммо бу барқарорликни клуб мухлислари ва раҳбариятини тўлиқ қониқтирадиган даражада, деб бўлмайди. "Бунёдкор"дан доимо юқори ўринлар учун кураш кутилган. Клубнинг халқаро миқёсдаги нуфузи ҳам бунга мажбур қилади. Айтилишича, бош мураббий Илёс Зейтуллаевни бешинчи ўрин қониқтирган, аммо менимча, "Бунёдкор" планкани анча юқорироқ қўйиши керак. Илёс Зейтуллаев яхши таркиб йиғди. Легионерлар ва жамоага қўшилган ёш футболчилар ўз имкониятларини намоён қилди. Сафарда "Нефтчи"ни мағлуб этгани, "Насаф"га жиддий муаммолар туғдиргани ёки Самарқандда "Динамо"ни ютганини алоҳида таъкидлаш мумкин. Бироқ кутилмаган ўйинларда очко йўқотишлар барқарорликка салбий таъсир кўрсатди.

"Пахтакор" Камолиддин Тожиев қўл остида Ўзбекистон кубогини қўлга киритди. Бу ҳам кутилган натижа эди. "Шерлар" мавсум бошида кўп очко йўқотди ва натижада Педру Морейра истеъфога чиқарилди. Камолиддин Тожиев ички чемпионатни яхши билгани туфайли вазиятни ўнглади ва жамоани иккинчи ўринга олиб чиқди. Морейранинг асосий муваффақиятсизлиги — ички чемпионатга тўғри баҳо бермагани ва жиддий ёндашмаганида бўлди. Олиб келинган легионерларни ҳам жуда кучли, деб бўлмасди. Унинг штабида маҳаллий футболни яхши биладиган мутахассис бўлиши керак эди, аммо бу йўл тутилмади ва оқибатда панд еди.

— Қаршининг "Насаф" жамоаси чемпионликни бой берди ва бунда амалга оширилган трансферлар, селекция ўз сўзини айтдими?

— "Насаф" селекция ишларини етарлича самарали олиб бормади. Рўзиқул Бердиев мавсум давомида анча қийналганга ўхшади. Атрофида трансфер масалаларида ёрдам берадиган мутахассислар етишмаётгандек. Бу йўналишда "аждарлар" изланиш олиб бориши шарт. Шунга қарамай, "Насаф" кейинги мавсумда янада кучли бўлиб қайтиши мумкин.

— "Шўртан" ва "Машъал" қандай тааассурот қолдирди?

— "Шўртан" Суперлигага тўлиқ тайёр эмаслиги билинди. Иккинчи давра олдидан таркибни шошма-шошарлик билан, асосан ёш футболчилар ҳисобидан шакллантирди. Мавсумнинг иккинчи қисмида жамоа яхшироқ ўйин кўрсатди, аммо поезд аллақачон кетиб бўлган эди. Мавсум олдидан пухта тайёргарлик кўрилмагани ўз таъсирини ўтказди. "Машъал" эса яхши мавсум ўтказди. Бюджети чекланган жамоадан бундан ортиқ натижа кутиш тўғри эмас, деб ҳисоблайман.

— Водий жамоаларидан "Нефтчи" ҳақида гапириб ўтдингиз. "Навбаҳор"даги пасайиш ва "Андижон"даги мураббийлар қўнимсизлиги ҳақида фикрингиз қандай?

— "Навбаҳор"даги пасайиш барқарор молиялаштиришнинг йўқлиги билан боғлиқ. Масалан, "Нефтчи"да бу борада муаммо кузатилмади. Шу омиллар таъсирида "Навбаҳор" мавсумни еттинчи ўрин билан якунлади. "Андижон"да талабчан мухлислар жуда кўп ва улар доим натижа талаб қилади. Хомяков ҳам, Шацких ҳам бу ишончни тўлиқ оқлай олмади. Кўплаб ўзгаришлар босим остида амалга оширилди ва буни тўғри қарор, деб ўйлайман. Кубок соҳиби сифатида ОЧЛ-2да қатнашган жамоа яхши таркиб йиғди, аммо на Хомяков ва на Шацких бу таркибни тўлиқ ишлата олди.

— Мавсум кашфиёти борасида ҳаммада турлича қарашлар шаклланди. Сизнингча, "Динамо" бу номга лойиқ эдими?

— "Динамо" эса бу мавсум бошидан баланд сакрай олди. Бу, аввало, барқарорлик билан боғлиқ. Вадим Абрамов қўли остида Про лигада бирга ўйнаб чиққан футболчилар бор. Вадим Карленович таркибда камдан-кам ўзгариш қилади. Жамоада катта юлдузлар бўлмаса-да, жипс ва рақобатбардош жамоа шаклланди. Самарқандликлар совринли ўринларга жуда яқин келди. Қаршидаги ўйиннинг сўнгги сонияларида яна битта гол урилганида, икки ёки учинчи ўринни эгаллаши мумкин эди. Агар "Динамо" кейинги мавсумда ҳам шу тенденцияни сақлаб қолса, клуб тарихидаги энг яхши натижани қайд этиши эҳтимолдан холи эмас.

— Про лига ҳақида икки оғиз тўхталмасак бўлмайди. Бу йил жамоалар сони камлиги туфайли интрига ҳам, қизиқарлилик даражаси ҳам юқори кечгани йўқ. Мутахассис сифатида кейинги йилга қандай йўл тутиш керак деб ҳисоблайсиз?

— Про лига мусобақаси эса, очиғини айтганда, унчалик қизиқ бўлмади. Ҳатто турнир жадвалларини қаердан кузатишни билмай қолдик. "Локомотив" биринчи ўринни эгаллаши кутилган эди, аммо буни катта қийинчилик билан амалга оширди. "Арал" эса бор-йўғи яна битта гол урганида биринчи ўрин билан Суперлигага чиқиши мумкин эди. Про лигани янада қизиқарли қилиш учун жамоалар сонини кўпайтириш керак. Ҳозирдан "Металлург" (Бекобод), "Яйпан", "Бунёдкор" ва "Пахтакор"нинг фарм клублари, шунингдек, "БухДУ" ва "ҚарДУ" жамоалари иштирок этиши мумкинлиги айтилмоқда. Камида 12 та жамоадан иборат лига шакллантириш лозим.

Айрим талабларга жавоб бермайдиган клубларга ПФЛ томонидан ўтиш даври учун енгилликлар берилиб, кейинги мавсумларда талаблар кескинлаштирилиши мақсадга мувофиқ. Таклифим аниқ: Про лигада 12 та ёки ундан ортиқ жамоа иштирок этиши керак.

— Якунланган мавсум муносабати билан барча жамоаларни табриклайман. Ҳаётимизда яна бир босқич ортда қолди. Клубларга янги мавсумга пухта тайёргарлик кўришни ва омад тилайман. Бу йил футбол жамоатчилиги билан бирга бўлдим, эксперт сифатида "Спорт" телеканалида туркум кўрсатувларда иштирок этдим. Барчага миннатдорчилик билдираман. Қайси лавозимда бўлишимдан қатъий назар, келгусида ҳам янги лойиҳалар орқали ўзбек футболига фойда келтиришни истайман.