Садриддин Абдуллаев: "Локомотив" — янги жамоа. Ичимдаги "футболчи" ҳиссини енгиб ўта олдим"

"Локомотив" — янги жамоа. Таркибимизда 15 нафар янги футболчи бор. Бугун бешинчи ўйинимизни ўтказдик. Секин-асталик билан бир жамоа бўлиб шаклланиб боряпмиз. Таркибдаги кўпчилик аввал бирга ўйнаган. Кундан кунга жамоа жипслашиб боряпти. Анталиядаги шароитлар яхши. Рақиблар кўп, турли мамлакат клублари билан ўйнаш имкониятига эга бўласиз. Биз шундан фойдаланишга ҳаракат қилдик ва Чехия, Руминия клубларига қарши ўйнадик. Ҳар бир мамлакатда ўзгача футбол мактаби бор. Йиғин доирасидаги назорат учрашувларида қайд этилаётган натижаларга эътибор бермаймиз. Асосийси, жамоани шакллантириб бориш.

Бизда таркиб аралаш. Масалан, 5 нафар футболчининг ёши 30дан ошган, қолганлари эса ёшлар. Таркибимизда 2007 йилда таваллуд топган футболчилар ҳам бор. Катта футболчиларни жалб этганимиздан мақсадимиз шу. Ёшларга тажриба улашиш ва уларни тезроқ профессионал футболга етказиб бериш. Фақат ёшлар ёки қариялар билан ўйнаб бўлмайди.

Анвар Раҳимовни U-21 жамоасига бош мураббий қилиб тайинладик. Ўтган йили U-19 жамоасида тўп тепган футболчиларни жорий мавсум "дубл"га ўтказдик. Секин-асталик билан иш олиб борамиз.

Футболчиликдан мураббийликка ўтиш осон эмас экан. Мен ҳам бироз қийналдим. Энг катта жасорат, "футболчи" ҳиссини йўқ қилиш экан. Ичимдаги "футболчи" ҳиссини енгиб ўта олдим деб ўйлайман. Ҳаёт ҳозир умуман бошқача. Футболчилик вақтингизда аҳамият бермаган нарсаларга мураббийлик чоғи эътибор бера бошлай экансиз.

Суперлига янада қизиқроқ бўлишини кутяпман. Дастлабки 5-6 тур қийин кечади, кейин эса барча жамоалар ўз ўрнидан жой ола бошлайди", – дея фикр билдирди Садриддин Абдуллаев.