Расман: Россия футболи тарихидаги энг тезкор гол муаллифи, "Насаф" ярим ҳимоячиси ва "Сурхон" ҳимоячиси "Локомотив" сафига қўшилди

Улардан бири беларуслик легионер Николай Ивановдир. Championat.asia сайти унинг "темирйўлчи"га айланаётгани ҳақида 22 декабрь куни ёзганди. 

Ўтган мавсумда Беларус чемпионатида бронза медалларига эга чиққан 25 ёшли ярим ҳимоячи Николай Иванов жамоа аъзосига айланди.

Беларуснинг "Славия" жамоаси таркибида 31 ўйинда 7 тадан гол ва ассист қайд этган марказий ярим ҳимоячи, шунингдек, чемпионатда вазият яратиш бўйича (36 голли вазият) 5-ўринда бўлган Николай Иванов янги мавсумни "Локомотив" таркибида ўтказади.

Қизиғи шундаки, Николай Иванов Россия футболи тарихида энг тезкор гол муаллифи ҳисобланади. У 2024 йилда "Машук" жамоаси таркибида "Химки" дарвозасини 4-сониядаёқ ишғол қилган.

Бундан ташқари, "темирйўлчилар" қуйидаги 2 футболчи трансферини ҳам эълон қилди.

27 ёшли футболчи Суҳроб Нуруллоев "Локомотив" футболчисига айланди.

"Локомотив" ўтган мавсумда "Насаф" таркибида 24 ўйинда қатнашиб, 2 гол муаллифига айланган ўнг қанот вингери билан шартнома имзолади.

Суперлиганинг янги мавсумига жиддий ҳозирлик қилаётган "Локомотив" таркибига 21 ёшли ҳимоячи Суннатилла Поёновни қўшиб олди.

Якунланган мавсумда "Сурхон" таркибида 24 ўйинда қатнашиб, 1 бора рақиблари дарвозасини ишғол қилган ҳимоячи янги мавсумда "Локомотив" шарафини ҳимоя қилади. У Ўзбекистон U-20 термасида 4 учрашувда иштирок этган.