"Моуринью — иккиюзламачи!" — Каррагер Винисиусни ҳимоя қилиб, Жозенинг "эски гуноҳлари"ни эслатди

Каррагер Винисиусни танқид қилган Моуриньюнинг гапларини асоссиз деб ҳисоблайди.

Можаро марказида — Винисиус:

Эслатиб ўтамиз, Винисиус голни бурчак байроқчаси ёнида рақс тушиб нишонлагани учун сариқ карточка олган ва кейинчалик ирқчиликка дуч келганини айтган эди. Жозе Моуринью эса буни "ҳурматсизлик" деб атаганди.

Каррагернинг кескин жавоби:

"Ҳар ким голни ўзи хоҳлаганча нишонлашга ҳақли. Винисиус ирқчилик ҳақоратларига чидаб туриши керак эмас.

Моуринью томонидан Винисиусни танқид қилиш — бу шунчаки иккиюзламачилик. Жозе футбол тарихидаги энг кўп провокация ишлатадиган мураббий-ку! Унинг "Олд Траффорд"да майдон бўйлаб югурганларини ёки "Челси"да ишлаётган пайтида "Ливерпуль" мухлисларига "овозингни ўчир" ишорасини қилганини эсланг. Шундай одам энди Винисиусни айбламоқдами?" — деди Каррагер.

Даҳолик ва нишонлаш ҳуқуқи:

Каррагер бразилиялик юлдузнинг голини юқори баҳолади:

"Бу Чемпионлар Лигасидаги фантастик гол эди. У буни қандай нишонлашни ўзи белгилайди. Моуринью эса аввал ўз фаолиятига назар ташласа ёмон бўлмасди", — дея қўшимча қилди эксперт.

Кўриниб турибдики, Мадрид ва Лиссабон ўртасидаги жанг энди ОАВ ва экспертлар даражасида янада қизимоқда. Жавоб ўйини олдидан муҳит ҳаддан ташқари таранглашган.