"Лапорта борган сари Трампга ўхшаб қолмоқда" — Виктор Фонт "Барселона"даги янги можароларга муносабат билдирди

Фонт Лапортанинг бошқарув услубини АҚШ президенти Дональд Трампга қиёслади.

Айбловларга раддия:

Фонт ўзи ва унинг жамоаси ушбу молиявий можароларга алоқадор эмаслигини кескин таъкидлади:

"Мен бу ишларга алоқадорлигимизни қатъиян инкор этаман. Бизнинг ягона орзумиз — «Барселона»нинг суд машмашаларига аралашиб қолмаслиги. Неймар, Негрейра, Бартогейт... Бу каби воқеалар клуб обрўсига фақат зарар етказади".

Лапорта ва Трамп ўхшашлиги:

Виктор Фонтнинг фикрича, Лапорта вазиятни ўнглаш ўрнига хаёлий душманлар билан курашмоқда:

"Лапорта кун сайин Трампга кўпроқ ўхшаб бормоқда. У хаёлий душманларни қидиради ва одамларни алдайди. Улар бизни бу жангга тортмоқчи, лекин мен шунчаки «Барселона» мухлисиман. Улар менинг номимни қора қилишни исташяпти".

Клуб келажагидан хавотир:

Фонт Испаниядаги суд тизими ва клубнинг аввалги жазоларини ҳам эслатиб ўтди:

"Биз шундай мамлакатда яшаяпмизки, гўёки ҳамма бизнинг азобланишимизни истайдигандек. Клуб бир марта ҳукм қилинган. Бундай шароитда қайси ҳакамнинг қўлига тушиб қолишингни билмайсан", — деди Фонт "RAC1" эфирида.

"Барселона"да президентлик сайловлари яқинлашгани сайин, номзодлар ўртасидаги "сўз жанги" янги босқичга чиқмоқда.