Ҳумоюн Муртозаев: “Мавсум якунида тўпрурарлар қаторида бўлишни истайман”

“Қалдирғочлар” бугунги бўлиб ўтиши режалаштирилган навбатдаги машғулотидан олдин ҳужумчи Ҳумоюн Муртозаевнинг фикрларига қулоқ тутдик.

“Карантиндан сўнг жамоавий машғулотлар ажойиб ва кўтаринки кайфиятда давом этмоқда. Жамоадаги ҳар бир футболчи қаттиқ меҳнат қиляпти, ҳар бир берилган кўрсатмани астойдил бажармоқда. Мавжуд юзага келган ҳолатда машғулотлар санита ва гигиена талабларига риоя қилинган ҳолатда олиб борилмоқда. Буларнинг барчаси бизнинг фойдамиз учун қилинган. Ҳаммани алоҳида сув ичадиган идиши бор, иложи борича масофани сақлаган ҳолда ҳаракат қиляпмиз.

Мураббийлар штаби бўлажак ўйинларга футболчиларни руҳий ва жисмоний жиҳатдан тайёрлашмоқда. Умуман олганда жамоанинг ҳар бир аъзоси қаттиқ тер тўкмоқда дея оламан.

Тўғри, “Бунёдкор” жамоасидаги барча билан тез чиқишиб кетдим, улар мени ўз оила аъзоларидек қабул қилишди. Мавсум якунигача нечта гол ура оламан? Нечта бўлиши аҳамиятсиз, тўпурарлар қаторида бўлиш ва жамоага фойда келтириш асосий мақсадим ҳисобланади”,- дейди Ҳумоюн Муртозаев.

Футболчи жорий мавсумда “Бунёдкор” сафида умумий ҳисобда 5та учрашувда майдонга тушди ва 3 бор ўз номига гол ёздириб қўйишга эришди. Дастлаб, ОЧЛ саралаш босқичида “Ал Завра” дарвозасига 2та тўп киритган бўлса, Суперлига 1-турида сафарда “Сурхон”га битта гол урди.

Абдулазиз Искандаров ёзиб олди