"Флориан келажакда "Реал"да ўйнашига умид қиламан" — Вирцнинг агенти Перес ва Алонсо билан бўлган суҳбатни ошкор қилди

У ёздаги трансфер ойнаси вақтида қилинган ҳаракатлар ҳақида гапириб берди.

Алонсо билан суҳбат:

Агентнинг сўзларига кўра, Вирцнинг трансфери бўйича "Ливерпуль" ёки "Бавария" вариантлари муҳокама қилинаётган пайтда, у Хаби Алонсо билан боғланган:

"Мен Хаби Алонсога қўнғироқ қилиб: "Сен "Байер"даги йигитни ўзинг билан "Реал"га олиб кетишинг керак", дедим. Хаби эса: "Буни менга эмас, "Реал" президенти Флорентино Пересга айт", деб жавоб қайтарди".

Пересга ёзилган хабар:

Шундан сўнг Штрут Мадрид клуби президентига тўғридан-тўғри мурожаат қилган:

"Қадрли Флорентино, мен сенга кўп марта айтганман: менда сенга тавсия қиладиган ажойиб ўйинчи бор. Флориан Вирц дунёдаги ҳар қандай жамоани кучайтира олади".

Перес агентга миннатдорчилик билдириб, уни бош директор Хосе Санчесга йўналтирган. Бироқ Мадриддан ҳеч қандай расмий таклиф тушмаган ва ёзда германиялик ярим ҳимоячи "Ливерпуль" сафига бориб қўшилган эди.

Нима учун ўхшамади?

Агент бунинг сабабини молиявий ҳолат ва жамоадаги рақобат билан изоҳлади:

"Ўша йили жамоа таркиби ва бюджети сабабли вақт ноқулай эди. Ҳатто "Реал"нинг ғазнаси ҳам доим тўла бўлавермайди. Лекин мен ҳали ҳам Флориан қачондир шу жамоада ўйнашига умид қилиб қоламан", — деди Штрут.

Кўринишидан, келажакда германиялик иқтидор эгасини "Қироллик клуби" сафида кўришимиз эҳтимоли ҳали ҳам сақланиб турибди.