Артета: "Венгер "Арсенал"га қайтиш учун тўғри вақт танлади"

Дербида иккинчи таймда урилган учта гол эвазига зафар қучган "тўпчилар" устози Артета кечаги кун "махсус кун" бўлганини таъкидлади. Сабаби ўйинни бевосита стадиондан кузатганлар орасида Арсен Венгер ҳам бор эди. 

Микель франциялик мутахассис ҳақида шундай деди:

"У тўғри вақт танлади. Чиндан ҳам алоҳида кун эди. Чунки "боксинг дэй" футбол ўйнаш учун жуда яхши кун. Бу ўйин Венгерга мос даражада бўлди ва унга ёқди, деб ўйлайман. Футболчилар унинг келгани ҳақида билишмас эди. Биз уни тинч қўйдик. Стен ва Жош ҳам шу ерда эди. Бу чиндан ажойиб кун бўлди. 

Келгани учун унга катта раҳмат. Умид қиламанки, бино бўйлаб сайр қила туриб, ҳамма у ҳақида ўйлайдиган нарсани, унинг бу ерда қолдирган меъросини ҳис қилади. Унинг шу ерда бўлиши клуб учун жуда муҳим".

"Арсенал" Букайо Сака, Габриэл Мартинелли ва Эдди Нкетиа томонидан киритилган учта тўп эвазига "Вест Хэм" устидан 3:1 ҳисобида устун келди ва 7 очколик фарқни сақлаган ҳолда АПЛ турнир жадвалида пешқадалик қилмоқда.