Алишер Никимбаев: "ОФК Осиё чемпионатларини кейинги йилга қолдирмоқчи"

"ОФК мазкур мусобақаларни кейинги йилга қолдириш ҳақида ўйламоқда. Бир қатор миллий федерациялар ОФКга мусобақани қолдиришни сўраб мурожаат қилган. Бунга сабаб қилиб бу ёшдаги терма жамоаларга ҳалигача машғулот қилиш мумкин эмаслигини кўрсатишган.

Қатарни оладиган бўлсак айни пайтда фақат профессионал футболчиларга машғулот ўтказиш рухсат берилган. Яъни ўсмирлар, ҳаваскор жамоалар машғулот ўтказишмаяпти. Уларга 1 сентябрь куни рухсат берилиши кутилмоқда, аммо бир ярим ой Осиё чемпионатига тайёргарлик учун етарли вақт эмас.

Бундай вазият Осиё чемпионатида қатнашадиган кўплаб мамлакатларда юзага келган. Шу боис ОФК ўзига маъқул келмайдиган вариантни ҳам кўриб чиқишга мажбур.

Хўш Осиё чемпионатлари қачон ўтказилиши мумкин? Иккала мусобақа ҳам Жаҳон чемпионатлари учун йўлланма беришини ҳисобга олиб ФИФА тақвимга қараймиз.

Индонезиядаги U-20 Жаҳон чемпионаи 20 майдан 11 июнга қадар бўлиб ўтади. Айни пайтга келиб ҳеч бир қитъада саралаш мусобақалари бўлиб ўтгани йўқ.

- Европа чемпионати 2021 март ойига кўчирилди.

- Африкада ҳатто қитъа чемпионати саралаши ҳам охирига етгани йўқ.

- Шимолий Америкада мусобақани номаълум муддатга қолдиришди.

- Жанубий Америкада саралаш мусобақасини февраль ойида ўтказишмоқчи.

- Океания чемпионати 2021 йил январь ойига белгиланган.

Яъни ОФК ҳам УЕФА сингари март ойида Осиё чемпионатини ўтказиши мумкин. Сабаби шу вақтга келиб стадионларимиз яхши ҳолатда бўлади.

Ўсмирлар ўртасидаги Жаҳон чемпионатида барчаси осон. Одатда U-17 мундиал кузда ўтади. Шундай экан ОФК май-июнь ойларида U-16 Осиё чемпионатини ўтказиши мумкин", - деб ёзади Алишер Никимбаев телеграмдаги ўз каналида. 

Маълумот учун, Ўзбекистонда ўтиши керак бўлган U-19 Осиё чемпионати 14-31 октябрь кунларига белгиланган. Баҳрайндаги U-16 Осиё чемпионати эса 25 ноябрь - 12 декабрь кунларига белгиланган.