Zohir Pirimov: "Tanaffus "Buxoro" uchun foydali bo'ldi deb o'ylayman"

Jamoa azolari yangi murabbiylar shtabi boshchiligida yig'inni olib bormoqda. O'tkazilgan o'rtoqlik uchrashuvlarini kuzata turib "Buxoro"ni o'yinida jonlanish borligini ko'rishimiz mumkin. Albatta, rasmiy o'yin bilan o'rtoqlik bahsi o'rtasida farq bo'ladi. Biz bu borada jamoaning tajribali futbolchisi Zohir Pirimovning fikrlariga quloq tutdik. 

"Yangi murabbiylar shtabining malakali va tajribali ekanligi mashg'ulotlarda bilinib turibdi. O'yinimizda o'zgarishlar bor yaxshi tomonga. Taktik jihatdan ham o'yindan-o'yinga o'sib boramiz. Jamshid Saidov va Aleksandr Xomyakov juftligi o'z g'oya, falsafalarini futbolchilarga singdirishga harakat qilishmoqda. Oraliqda yuzaga kelgan tanaffus biz uchun foydali bo'ldi deb o'ylayman. 

Jamoada ishlayotgan barcha mutaxassislar motivaciya, kurashuvchanlikni qaytarishga harakat qilishmoqda. Futbolchilar ham mashg'ulotlarda astoydil ter to'kmoqda. Oldinda kutayotgan uchrashuvlarda hammasi ijobiy ko'rinish olishiga ishonaman. 

Birinchi galda o'yinimizda tartib, harakatlarimizda tajovvuzkorlik, jangovorlik bo'lishini murabbiylar takidlashmoqda. Umuman olganda "Bunyodkor" bilan o'yinga tayyorgarlik ko'ngildagidek o'tdi. Biz uchun har bir uchrashuv finalga teng. Ortga yo'l yo'q. Har bir qo'lga kiritilgan ochko turnir jadvalidagi o'rnimizga tasir qiladi. Muhimi ayni paytda egallab turgan o'rnimizni  yaxshilashga etibor beramiz",- deydi Pirimov.

Abdulaziz Iskandarov yozib oldi.