JCH-2014. Argentina – Belgiya. PREVYU

“Mane Garrincha” nomli stadionda Argentina va Belgiya yarim finalga chiqish uchun o'zaro bahs olib boradi. Nimchorak finalda har ikkala jamoa ham qiyin uchrashuvni o'tkazdi. Argentina SHveycariya ustidan bir amallab g'alaba qozongan bo'lsa, Belgiya murakkab kechgan o'yinda AQSHni mag'lubiyatga uchratdi. Eng qizig'i, oldingi ikkita bahsda ham qo'shimcha bo'limlar o'ynaldi.

Mana endi tomonlar yarim finalga chiqish uchun o'zaro bahs olib borishadi. Albatta, favorit sifatida Argentina tilga olinayotgani bor gap, lekin Belgiyaning maqsadi mo'jiza ko'rsatish hisoblanadi va buning uchun ular oxirigacha kurashishga tayyor.



Bugun jarohati tufayli Serxio Aguero o'z jamoasiga yordam bera olmaydi. SHuningdek, Roxo sariq kartochkalar sabab o'yinni o'tkazib yuboradi. Uning o'rnida Basantaning harakat qilishi kutilmoqda. Agueroning o'rnida esa Lavessi emas, balki Rodrigo Palasio to'p suradi.

Belgiya termasi ustozi Mark Vilmots avvalgi bellashuvlarda tarkibni bir necha bor almashtirib ko'rdi. Lekin buyog'iga eksperimentlar ketmaydi. Murabbiy eng kuchli tarkibni tushirishga harakat qiladi. Avvalgi bellashuvda o'zini ko'rsata olmagan Origining o'rnini Lukaku egallaydi.



JCH-2014. ¼ final
ARGENTINA – BELGIYA
Bosh hakam: Nikola Riccoli (Italiya)

Taxminiy tarkiblar

Argentina: Romero - Sabaleta, F.Fernandes, Garay, Basanta - Maskerano, Gago, Di Mariya - Messi - Palasio, Iguain

Belgiya: Kurtua - Alderveyreld, van Byuyten, Kompani, Vertongen - Vitsel, Fellayni - Miralyas, de Breyne, Azar - Lukaku

Jarohat olganlar: Aguero - Vermalen
Diskvalifikaciya: Roxo (Argentina)

SHveycariya bilan kechgan bahsda Messi to'p kiritmagan bo'lsa-da, katta hajmdagi ishni bajardi. Qolaversa o'yin oxirlarida aynan uning to'p uzatishidan so'ng Di Mariya gol urishga muvaffaq bo'ldi. Ko'pchilik Argentina terma jamoasi faqat Messidan iborat emas deyayotgan bo'lsa-da, aslida unday emas. Negaki bazi o'yinlarda ko'rdik, Messisiz Argentina qanday jamoaga o'xshab qolishini.



Alexandro Sabella (Argentina termasi bosh murabbiyi):
“Tarkibingda Messidek o'yinchi bor ekan, baribir unga bog'lanib qolasan. Butun jamoa kabi Messi ham bosh sovrin uchun kurashmoqda. U - dunyodagi eng yaxshi futbolchi, lekin ayni paytda jamoaning bir azosi xolos”.

Mark Vilmots (Belgiya termasi bosh murabbiyi):
“Men uchun jamoamda Messi yoki Neymarga o'xshagan alohida yulduz bo'lgandan ko'ra yakdil kollektiv bo'lgani maqul. Argentinaga qarshi bahsda biz favorit emasmiz, ammo raqib doim ham bir tekis o'yin ko'rsatmayapti. Bundan esa foydalanib qolmoqchimiz”.

Oxirgi uchrashuv - 26.06.1986. Argentina - Belgiya 2:0 (Maradona - 2)

Qiziqarli faktlar
- Argentina oxirgi uchta JCHda chorak finalga qadar etib kelgan va yarim finalga o'ta olmagan.
- Argentinaning to'p bilan o'rtacha muomalasi 64,3 foizni tashkil qilmoqda, bu esa chorak final ishtirokchilari orasida eng yaxshi ko'rsatkichdir.

X.Xoliqov tayyorladi.