"Yozyovon" futbolchilari "Lokomotiv-BFK" ustidan qozonilgan g'alabadan so'ng qanday fikrda?

Abdulaziz Jo'raboev: Bugun bizda ishtiyoq juda kuchli edi.

- Avvalambor, bugun uchrashuvni o'tkazishimizga ruxsat berganligi uchun O'zbekiston Professional futbol ligasi rahbariyatiga jamoamiz azolari nomidan minnatdorchilik bildiramiz. Avvalgi uchrashuvni o'tkaza olmaganimiz bois, bugun bizda ishtiyoq kuchli edi. SHu bois uchrashuvga jiddiy tayyorgarlik ko'rdik. Nasib qilsa, keyingi turda o'z maydonimizda "Labsa" jamoasi bilan bo'lib o'tadigan uchrashuvda jamoamiz muxlislariga yana bir g'alaba tortiq etmoqchimiz.

Bugungi uchrashuvda raqib darvozasiga gol kiritib, jamoamiz g'alabasiga o'z hissamni qo'shganimdan xursandman. Nasib qilsa qolgan o'yinlarda bundan ko'proq gol urmoqchiman.
Kuni kecha PFL bosh direktori Omonjon G'ofurovning otalari vafot etganligini eshitdik, butun klubimiz nomidan marhumning oila azolariga hamdardlik bildiramiz.

Jasur Otaxonov: Barcha talaba bo'lgan yoshlarni tabriklayman.

- Bugungi o'yinga jiddiy tayyorgarlik ko'rgan edik. Turnir jadvalida peshqadam "Nurafshon" jamoasiga yaqinlashib olishimiz uchun bizga bugun faqat g'alaba zarur edi. SHu bois uchrashuv boshidanoq hujumkor futbol namoyish etdik. Maqsadimizga etib, tezkor gol urib olganimizdan so'ng bizda qo'shimcha ishtiyoq paydo bo'ldi. Bugun butun jamoamiz yaxshi o'ynadi va yakunda g'alaba qozondik.

Kecha o'zim hujjatlarimni topshirgan oliygohda imtihon natijalari elon qilindi. Imtihon natijalariga ko'ra talabalik baxtiga muyassar bo'ldim. SHu bois kayfiyatim alo darajada, bugungi qo'lga kiritilgan g'alaba qo'shaloq to'yona bo'ldi deb ayta olaman. Barcha o'qishga kirgan yoshlarni chin qalbimdan tabriklayman. Nasib etsa ona Vatanimiz uchun etuk mutaxassis bo'lib etishib, o'zbek futboli rivojiga o'z hissamni qo'shmoqchiman!

Bekzod Tolibov yozib oldi.