Yosh “qaldirg'ochlar” xalqaro turnirlarda ishtirok etishmoqda

2009 yildan beri o'tkazilib kelinayotgan bu turnir yosh futbolchilar orasida tashkil etiladigan eng ommaviy musobaqalardan biri hisoblanib, Rossiya Futbol uyushmasi shafeligi ostida o'tadigan memorialning umumiy ishtirokchilar soni 160 tadan oshadi. Ushbu turnir “Bunyodkor” klubi uchun yoqimli taassurot qoldirgan. Sababi, 3 yil avval “Memorial Bubukina-2011” musobaqasidan Otabek G'ulomxo'jaev murabbiyligidagi 2000 yilda tavallud topgan yosh “qaldirg'ochlar” bosh sovrin bilan qaytishgan edi. Bu yilgi musobaqa 24-31 mart kunlari Sochidagi “Dargomis” sport majmuasida tashkil etiladi va ishtirokchilar qatorida “Bunyodkor” jamoasi ham bo'lib, Denis Krasnichenko murabbiyligidagi 2003 yilda tug'ilgan yosh futbolchilar o'z tengqurlari bilan kuch sinashishadi.

Jamoamiz ushbu musobaqani ko'tarinki ruhda boshladi va dastlabki 2 turda o'z raqiblarini mag'lubiyatga uchratdi. Novosemeykino shahrining “Akron” klubilik tengdoshlari kuch sinashgan “qaldirg'ochlar” 1:0 hisobida ustun kelishgan bo'lsa, Moskvaning “Sokol” jamoasi 2:1 hisobida taslim etildi.

SHuningdek, Turkiyaning Antaliya shahrida “PARUSA CUP-2014” Xalqaro turniri bo'lib o'tmoqda. 2002 yilda tavallud topgan futbolchilar musobaqasida Sergey CHigodaev va Akmal Risqullaev shogirdlari shu kungacha uch uchrashuvda maydonga tushishdi. Guruh bahslarida Qozog'istonning 1-BO'SM (SHimkent) jamoasini 4:1 hisobida mag'lubiyatga uchratgan “qaldirg'ochlar”, keyingi o'yinda Moskvaning “CHertanovo” klubiga 2:3 hisobida imkoniyatni boy berdilar. SHunga qaramasdan jamoamiz “S” guruhida 2-o'rinni egallab, chorak finalga yo'l oldi. Bu bosqichda yoshlarimizga turnirning eng kuchli jamoalaridan biri – “Lokomotiv” klubi ro'baro' keldi. Qiziqarli o'tgan bahsning asosiy vaqti 2:2 hisobidagi jangovar durang bilan yakunlandi. Penaltilar seriyasida esa omad moskvaliklar tomonida bo'ldi. Endi 5-o'rin uchun bahsda “Bunyodkor” o'smirlari Moskva viloyatining “Rosich” jamoasiga qarshi maydonga tushishadi.