Xabi Alonso: "Ertangi o'yin 2:5 kabi bo'lmasligiga 100% aminman. Ertaga boshqacha tarix yoziladi"

"Real Madrid" va "Atletiko Madrid" uchrashuvidan oldin o'tkazilgan matbuot anjumanida Xabi Alonso savollarga javob qaytardi.

Bu yarim final, shuning uchun biz ruhiy jihatdan juda yaxshi tayyorgarlik ko'rishimiz, oxirigacha kurashishimiz va mayda-chuydalarga etibor qaratishimiz kerak. Ular doimo talabchan raqib. Bizda bor kuchimiz bilan o'ynash uchun barcha asoslar bor, unvon o'rtada turibdi, shuning uchun bu juda muhim. "2:5 hisobidagi mag'lubiyat? Biz buni unuta olmaymiz. Ertaga bu xatolarni takrorlashga haqqimiz yo'q. Ertaga boshqa tarix yoziladi, bunga aminman", -deya so'z boshladi Xabi Alonso.

Murabbiy jarohatlar haqida ham gapirib o'tdi:

"Mbappe iloji boricha tezroq safga qaytishiga umid qilamiz. Bu uchrashuvda maydonga tushishiga umid qilgandik, ammo buning iloji bo'lmadi. Karvaxal biz bilan, ammo uni ertaga majburlab maydonga tushira olmaymiz. Qaytishiga hali bor"

Shundan so'ng murabbiy o'yinga bo'lgan rejalari va unda Vinining o'rni haqida so'z yuritdi:

"Ertangi o'yin 2:5 kabi bo'lmasligiga 100% aminman. Kurashlarga boy, qiziqarli o'yin bo'lishi kafolatlangan.  "Betis"ga qarshi o'yinda Viniga chuqurroq pressing qilishini aytgandim, ha. Butun jamoa birdek pressing qilishi elementar qoida. Bu hammaga tegishli. Biz yaqinroq o'ynashimiz, ko'p yugurishimiz zarur. Shundagina natija keladi.  Ertaga Vini o'zining eng zo'r o'yinini ko'rsatishi kerak. Biz uchun u o'ta muhim figura. U o'yindan zavqlanishiga sharoit yaratishimiz lozim. Agar buni uddalasak, u juda katta xavf yarata oladi.

La Ligani zo'r boshlagandik. Orada tushish bo'ldi. Chunki mavsum turli xil fazalarga bo'linadi. Har xil holat yuz beradi, jarohatlar sabab taktikani o'zgartirishga to'g'ri keladi. O'zimizga ishonchimiz baland.

Yarim himoyada kim o'ynashini ertaga bilib olasiz. Bizda rang-barang rejalar bor", -dedi Xabi Alonso.

Nodirxo'ja Yuldashev, Jidda shahridan eksklyuziv

Shundan so'ng "Real Madrid" o'yindan oldingi rasmiy mashg'ulotiga kirishdi: