SHuhrat Maqsudov "Paxtakor" akademiyasi direktori etib tayinlandi

SHu munosabat bilan bugun "Paxtakor" stadionining anjumanlar zalida murabbiylar ishtirokida tadbir bo'lib o'tdi. Unda Toshkent klubi rahbariyati ham ishtirok etdi.

"So'nggi ikki yilda akademiyamizda amalga oshirgan ishlarimiz ortidan saviya sezilarli darajada ko'tarildi. "Paxtakor" hamisha o'z tarbiyalanuvchilariga tayanib kelgan jamoa. Biz buni yaxshilash uchun maxsus loyiha ustida ish olib boryapmiz. Akademiyaga qo'shimcha maydonlar kerak va bu klubning bosh vazifalaridan biri bo'lib turibdi. Undan tashqari, CHilonzordagi bazamizdagi suniy maydonni zamon talablariga javob beradiganiga almashtirish va homiylarimiz ko'magida Qibraydagi sport majmuamizda qo'shimcha tabiiy maydonlarni qurib, uni yoshlar ixtiyoriga topshirish rejalashtirilgan. Mana, stadion ichidagi "shaxmatka" deb nomlanadigan maydon yangilandi. Ko'rib turganingizdek, oldimizda katta ishlar turibdi, bu borada Sizlar bizga yordam berishingiz kerak", - deb takidladi "Paxtakor" FK rais o'rinbosari Dilshod Karimov.

SHuhrat Maqsudovga 1 oy muddat ichida akademiya istiqboliga bag'ishlangan katta dasturni ishlab chiqib, uni klubga taqdim qilish borasida vazifa yuklatildi. Bu ishni mutaxassis akademiyadagi murabbiy va xodimlar bilan hamkorlikda bajaradi.

SHuhrat Maqsudov bildirilgan ishonchga javoban shunday dedi:
- Ayni paytda murabbiylar bo'yicha ahil jamoa shakllangani ishim oson kechishiga turtki bo'ladi. Qolaversa, klub rahbariyatining avvalgi yillarga qaraganda maoshlarni oshirgani va qarzdorlik yo'qligi, biz va jamoamizga faqat to'g'ri, vijdonan ishlash kerakligini anglatadi. Haqiqatdan, aytilganidek, tez kunlarda klubimizga yangi akademiya binosi quriladigan bo'lsa, unda asosiy jamoaga etkazib beradigan futbolchilarimizning saviyasi ancha baland bo'ladi.

Ayni paytda "Paxtakor" futbol klubi o'z akademiyasini jahon standartlariga xos tarzda yangidan bunyod qilish bo'yicha ish olib boryapti.