"SHo'rtan" PFK rahbariyatida o'zgarish

4 aprel kuni klubning bosh homiysi hisoblangan "SHo'rtanneftgaz" MCHJ majlislar zalida navbatdan tashqari kengaytirilgan yig'ilish o'tkazildi. Yig'ilishni ushbu kompaniya Boshqaruv raisi Xotam Mustonovich SHaripov olib bordi. Kun tartibidagi asosiy masala "SHo'rtan" PFK bosh direktorligi lavozimiga yangi mutaxassis tayinlashdan iborat bo'ldi. Xotam SHaripov mazkur masala yuzasidan nutq so'zladi hamda yig'ilganlarni majlisning asosiy maqsadi bilan atroflicha tanishtirdi va klubga yangi rahbar tayinlash xozirgi kunda kechiktirib bo'lmaydigan darajada muhimligini malum qildi.

SHu kungacha klubni boshqarib kelgan Oblayor Rasulovning sog'ligi yomonlashgani va shu munosabat bilan ushbu rahbar o'z vazifasini bajarishni to'laqonli olib borishi qiyinlashganligi sababli, O.Rasulov o'z arizasiga binoan egallab turgan lavozimidan ozod etildi.

Uning o'rniga voha futboli muxlislariga yaxshi tanish bo'lgan, o'z vaqtida "SHo'rtan" jamoasida futbolchi sifatida faoliyat ko'rsatgan, shuningdek, "SHo'rtan" jamoasi birinchi ligadan oliy ligaga chiqishida rahbar sifatida katta xissa qo'shgan SHodi Nomozov klubga yangi bosh direktor etib tayinlandi.

Ertasiga, 5 aprel kuni, "SHo'rtan" PFKning Qarshi shahridagi qarorgohida yangi bosh direktorning klub ishchi-xodimlariga, murabbiy va futbolchilarga tanishtiruv marosimi o'tkazildi. Tadbirda SHodi Nomozov so'zga chiqib, unga berilgan ishonchni oqlashga, unga yuklatilgan vazifalarni imkon qadar oliy darajada bajarishga, "SHo'rtan" jamoasini oliy ligadagi namunaviy klublar qatoriga qaytarishga bor kuchini ayamasligini izhor etdi.

Homiy tashkilot - "SHo'rtanneftgaz" MCHJ tomonidan 2016 yilgi mavsumda jamoa oldiga chempionatda kamida 7-10-o'rinlarni egallash, muxlislar uchun chiroyli va mazmunli o'yinlar namoyish etish vazifasi qo'yildi.

Ushbu masala yuzasidan so'zga chiqqan jamoaning etakchi futbolchilari - Asror Aliqulov, Igor Taran va Eldor Tojiboevlar homiylar va muxlislar ishonchini oqlashga harakat qilishlarini takidlashdi.

O'ylaymizki, yangi rahbar - SHodi Nomozov qo'l ostida "SHo'rtan" klubi mavsumning keyingi qismini muvaffaqiyatli o'tkazadi va o'z oldiga qo'yilgan vazifalarni alo darajada uddalaydi.

"SHo'rtan" PFK matbuot xizmati