SHerzod Temirov "Atletiko Madrid"ga qarshi o'yindan so'ng nimalar dedi?

Mazkur klub safida hamyurtimiz SHerzod Temirov to'p tepmoqda, u kecha o'yinda jamoasining yagona goliga mualliflik qildi. Bahsdan so'ng esa futbolchimizning fikrlari bilan qiziqdik. 

O'zbekistonlik futbolchi o'rtoqlik o'yinida "Atletiko Madrid" darvozasiga gol urdi

- Bu uchrashuvni barcha ancha vaqtdan beri kutayotgandi. Jamoamiz ham shunga yarasha tayyorgarlik ko'rdi, Tailandda 20 kunlik o'quv-mashg'ulotini olib bordik, 5 kun oldin Xitoyga qaytib keldik. Sizga aytsam, "Atletiko Madrid" bilan uchrashuv katta taassurotlar bilan yodda qoldi. Allohga shukur, hissiyotlar o'zgacha. Nafaqat Ispaniyaning balki Evropaning nomdor jamoasi bilan o'ynash katta tajriba berdi deb o'ylayman. Bu futbolda juda muhim omillardan biri hisoblanadi. To'g'ri, katta hisobda yutqazdik. Lekin raqib oddiy jamoa emasdi. Bizni yaqindan qo'llab-quvvatlagan muxlislarimizga rahmat aytib qolaman. 

- Yulduzlari bor jamoa doim yuqori o'rinlar uchun kurashadi. Ko'rganingizdek, o'yin juda qiziq o'tdi. "Atletiko Madrid" havas qilishga arziydigan klub. Ularga qarshi to'p tepish mahoratni yanada oshirishga xizmat qiladi. Taktik ishlanmalari yuqori darajada ekanligi ko'rinib turibdi. Men asosan hujum chizig'ida harakat qiladigan futbolchilarni ko'proq kuzataman. Ushbu o'yinda o'zimga kerakli detallarni ko'rib oldim. Ulardan o'rganadigan ko'p narsalarimiz bor. 

- Golimga kelsak, nima deyishni ham bilmayman. Ochig'i o'zim kutmagandim. Lekin niyat bor edi. Yaxshi niyat, mehnat, sabr har doim katta rol o'ynashini isboti bo'ldi deya olaman. Golni qanday tariflashni ashaddiy futbol muxlislariga qoldiraman. Ularning ishonchi bizga katta kuch beradi. 

- Bellashuvdan so'ng barcha futbolchilar, murabbiylar bilan ko'rishdik. Do'stona xayrlashdik, futbolka almashish ham esdan chiqqani yo'q. 

Abdulaziz Iskandarov yozib oldi