Sanjar Rashidov: "Bunyodkor"da raqobatda yutqazganim yo'q"

O'z vaqtida "So'g'diyona"da etakchiga aylangan va o'zini ko'rsatgan futbolchi "Bunyodkor"da ham nimalarga qodirligini ko'rsatishi kutilgan edi. Lekin unday bo'lib chiqmadi. Ko'p hollarda o'yin amaliyotisiz qolib ketdi. Endilikda Sanjar Rashidov qanday yo'l tutadi? Ortda qolgan mavsumda raqobatda yutqazdimi? SHu va boshqa savollar bilan unga yuzlandik. 

- O'tgan mavsumda siz bilan suhbatlashganimizda "Bunyodkor" orqali faoliyatimda yangi sahifa ochishni maqsad qilganman, degansiz. Poytaxt klubidagi faoliyatingiz o'zingiz o'ylagandek chiqdimi?

- Assalomu aleykum. To'g'ri "Bunyodkor"ga ulkan niyatlar bilan borgan edim. Lekin har doim siz o'ylagan narsa bo'lavermas ekan. O'zim istagan darajada o'ynay olmadim. Mavsum davomida kam maydonga tushdim. Qisqasi qoniqqanim yo'q. Hammasi xudodan. 

- Sizningcha, nima uchun jamoani ko'p futbolchilar tark etmoqda?

- Aksariyat o'yinchilarning shartnomasi 31 dekabr kuni yakunlagan. To'g'risi qolganlarning vaziyatidan xabardor emasman. 

- Sanjar Rashidovning keyingi manzili qaysi jamoa bo'lishi mumkin?

- Hozir biror narsa deya olmayman. Nasib qilsa, tez kunlarda aniq bo'ladi. 

- "So'g'diyona"dagi o'yiningizni "Bunyodkor"da ko'rsatishingizga nima to'sqinlik qildi? Balki raqobatda yutqazgandirsiz. Har holda siz o'ynaydigan poziciyada futbolchilar ko'p edi...

- Yuqorida aytganimdek ko'p ham maydonga tushmadim. Asosan zaxiradan o'yinga qo'shildim. Jamoada kuchli ijrochilar yig'ilgan. Buni tan olaman. Ammo men raqobatda mag'lub bo'lmadim. Ayrim sabablarga ko'ra, bazi bir insonlar uchun shunday holat yuz berdi. 

- "So'g'diyona"ning ikkinchi o'rinni olishi tarixiy natija sifatida qabul qilindi. Jizzaxlik muxlislar bu borada sizni ham unutishmaganini, tabriklashganini eshitdik...

- Bu men uchun jonajon jamoa hisoblanadi. Jizzaxda 10 yil to'p tepdim. Qaerda bo'lsam ham "So'g'diyona" yuragimda turadi. Mavsum davomida muxlislik qildim, deb baralla ayta olaman. Klub buning uchun ko'p mehnat qildi. Rahbar O'ktam Mahmudjonov ko'p ishlarni amalga oshirdi.  To'g'ri takidladingiz o'shanda kumush medal bilan ishqibozlar menga ham qo'ng'iroq qilib qutlashdi. Yangi mavsumda ham ularga faqat omad tilayman.