Samvel Babayan: "CHempionatdagi intriga deyarli tugadi"

- O'yin haqida

- O'ylaymanki, bugun yaxshi o'ynay olmadik, ayniqsa, birinchi bo'limda. CHempionatdagi "pauza"dan keyin qiynalyapmiz. Afsuski, o'yinga kirishib ketish qiyin kechdi. Bugun jamoamiz birinchi taymni o'ta muvaffaqiyatsiz o'tkazdi. Bu ko'proq psixologik muammoga o'xshayapti. Afsuski, qulay imkoniyatlardan foydalana olmadik. 

"Olimpik"ni tabriklayman! Ular juda yaxshi o'ynashdi, sifatli futbol ko'rsatishdi, gollar ham alo darajada bo'ldi. Afsuski, yutqazdik. CHempionatdagi intriga deyarli tugadi. Ushbu mavsumni tahlil qilib chiqishga hali erta. Hali yana 3 ta o'yinni munosib o'tkazib olishimiz kerak.

- Jasur Yaxshiboev avvalgi o'yinlarda ko'rinmayotgandi. Bugun "Navbahor" qaydnomasiga ham kiritilmadi. Vaholanki, u terma jamoa yig'iniga taklif etildi. U bilan bog'liq vaziyatni ochiqchasiga ayta olasizmi? U jamoani tark etganmi?

- Jasur Yaxshiboev davolanish va reabilitaciya jarayonini o'tash uchun ketgandi. U Masharipov safarga bora olmagani uchun termaga chaqirilgandi. 

- "Navbahor" bugun rasman chempionlik poygasidan chiqib ketdi. Jamoa chempionlikni ham, kubokni ham qo'lga kiritolmadi. Mavsum qanday o'tdi deb o'ylaysiz?

- Oldimizga qo'yilgan vazifalarni uddalay olmadik, bu – fakt. Mavsum tugagach, tahlil qilib chiqamiz va umumiy xulosaga kelamiz. CHempion ham bo'lolmadik, kubokni ham yutolmadik. Buni mavsum yakunida ko'rib chiqsak bo'ladi.

- "Navbahor"da keyingi tur oldidan yo'qotishlar juda ko'p. Jamoaning jismoniy tayyorgarlik murabbiylari va shifokorlari faoliyatini qanday baholaysiz?

- Jamoamizda iqtidorli murabbiy (Aleksa Boshkovich – tahr.) ishladi. Afsuski, u jamoadan ketdi, bu uning oilaviy holatiga bog'liq vaziyat edi. U bilan kuni kecha gaplashdik. O'ylaymanki, hozirgi paytda "Navbahor"ning jismoniy tayyorgarligi bilan hammasi yaxshi. Aks holda jamoa 98-daqiqagacha hujum qilmasdi. Boshkovichga yordam berib kelgan SHerzod Jo'raev hozir uning o'rnida ishlayapti. Ishontirib ayta olamanki, u yuqori darajada faoliyat olib bormoqda.